Thil dik lo a awm - Trent Alexander-Arnold

Liverpool right back Trent Alexander-Arnold beidawng a ṭawng chhuak a, tun hnaia che chhe tak Reds defender chuan an team-ah chuan siam ṭhat ngai a awm thu a sawi.

English full back chuan, "Team kan nihna angin, eng emaw dik lo chu a awm a ni. Kan duhdan angin thil a kal thei lo a, chu chu kan zavaia kan ngaihtuah tlan a ngai.

"Kan harsatna sukiang turin theihtawp kan chhuah tlan a ngai a, a dik lo lai hi tihdik dan kan ngaihtuah a ṭul. A bik takin top four ni tura kan elpui, Spurs nena kan inkhelh hunah kan tihdik lohte kan siamrem a ṭul ang," a ti.

Liverpool hian league-ah rin loh taka Nottingham Forest (1-0) an ngam loh hnuin, Inrinni zan khan Anfield-ah Leeds United chu 2-1 in an ngam lo leh tawh - Arnold-a'n nomawi a sawi ngam tawh lo a, 'top four' chu a sawi ngam tawk a ni.

Reds hian league match 12 an khelh tawhah vawi li chiah hnehna an la chang a, vawi li draw result neiin, vawi li an tlawm tawh bawk - point 16 chiah an la nei! Season hmasa khan match 12 an khelhin point 25 an nei a, vawi khat chiah an tlawm.

Arnold chuan, "A pawimawh ber chu kan thawhho ṭhat a, kan dik lohna lai kan en a ngai. Tunah chuan World Cup chawlh a nih hmaa a tam thei ang ber point hmuh tum phawt a ṭul.

"World Cup chawlhlawk hi kan tan malsawmna a ni thei a, season chawhnu lama insiamrem tura hun min petu a ni thei a ni," a ti a, chawlh vat a chak ni berin a lang!

Liverpool hian league-ah World Cup hmain match hnih khelh tur an la nei a, November 6-a Spurs an hmachhawn zawhah Southampton chu an match hnuhnung berah an hmachhawn dawn a ni.

Reds legend Jamie Carragher chuan, "Hei hi rei lo tê atana buaina a ni lo a, ngaihtuah ṭul tak buaina a ni," tiin Liverpool-in siamṭhat ngai an neih thu a sawi a, Liverpool player leh coach hlui Graeme Souness chuan midfield vang nia a hriat thu a sawi.

Souness chuan, "Liverpool midfield hian an khingpuite nuamsain an siam ngai lo a, tunah chuan a letling thawk a ni ta. An midfield khelh ṭhat loh avangin tlarhnung a pawp a, tlarhmaah tun hma angin chance an siam tam bawk si lo," a ti.

England legend Alan Shearer chuan, "Manchester City an hneh khan an insiamrem dawn emaw ka ti a, mahse, tlarhnungah an khel chhe ṭhin em a ni. Tihsual an ngah a, goal an veng ṭha tawk lo a, an tlarhnung hi paltlang a awl lutuk a ni," a ti a, a dim lo hle.

Reds hian zanin dar 1:30-ah Champions League match khel turin Napoli an mikhual dawn a, last 16 an luh tawh tho avangin Klopp-a'n Spurs ngaihtuah chunga player a hahdamtir a nih pawhin a mak lo ang.

Chutihrual chuan Liverpool hian group hmahruaitu ni chunga last 16 luh beiseina an la nei a, chumi tur chuan Napoli hi si li fai tala an hneh a ngai thung.