Chak dan thiam lo NorthEast an tlawm leh ta!

Indian Super League-ah point la hmu ve miah lo team pakhat an awm a, an hming chu NorthEast United a ni - Guwahati club hian Pathianni zan khan Jamshedpur FC chu khualmualah an lenchilh a, 1-0 in an tlawm leh ta!

Jamshedpur tan Peter Hartley chuan inkhela goal awmchhun a khung a, Highlander-in a chhanletna tur an nei lo - match li zet a zawnin an tlawm ta a, ISL-a season an ṭan chhiat ber ṭum an tawng.

ISL an match hmasa bera hnawhchhuah tawk tawh, NorthEast United coach Marco Balbul chu JFC lakah pawh hnawhchhuah a ni leh ta a, red card vawi hnih a hmu der tawh - a team point hmuh aiin a red card hmuh a tam zawk.

JRD Tata Sports Complex, Jamshedpur-a inkhelah mualneitu team tan Ricky Lallawmawma leh Laldinliana Renthlei ten inkhel bul an ṭan ve ve a, Highlander tan Joe Zoherliana leh Emanuel Lalchhanchhuaha ten bul ṭanin, Rochharzela chu bench aṭanga luhtir a ni bawk.

Nizanah ISL inkhel a awm lo a, Ningani zanah FC Goa-in Jamshedpur mikhualin, an khel ṭan leh chauh ang.