Torino lakah Milan an chesual

Serie A champion lai AC Milan chu Torino mualah 2-1 in an chak lo. Milan hi table-ah pathumna chu an la ni tho, mahse hmahruaitu Napoli nen an inkarah point nga a awm ta a, nomawi humhim tur chuan hna a hautak tawh dawn.

Pathianni zan Serie A inkhelah, mualneitu Torino lamin Koffi Djidji leh Aleksei Miranchuk ten chawlhlawk hmain goal an khung, ball chang tam Milan chu nasa taka mualpho thei dinhmunah an ding.

Second half-ah Junior Messias hmangin an sut ṭhen a, goal dang erawh an sual chhuak zo tawh lo. Striker tawnhriat nei ṭha, season hmasa lama anmahni chhanhim fo tawhtu Olivier Giroud an dah luh hnuah pawh goal a pai tel ta bik lo a ni.

Milan coach Stefano Pioli chuan, "Kan khel ṭha lo tih chu phat rual a ni lo. Kan phur tawk lo a, kan inpekna pawh a thuk tawk lo. A bik takin kan khingpuite goal hmaah kan hriam tawk lo kha a pawi hle.

"Danglamna siam beiseiin player ka siksawi a, mahse chu pawh chuan awmzia a nei thui ta lo. Chutihrualin chhe ta duai erawh kan ni lem lo, kan hun ṭha neih kha khung ni ila chuan result a danglam daih thei," tiin a sawi.

Inkhel dangah Atalanta chuan Empoli 2-0 in an hneh a, match 12 aṭanga point 27 hmuin pahnihna dinhmun an luah. Nizan khan Jose Mourinho enkawl AS Roma an inlan a, result kan hre hman lo. Season dang aiin nomawi chuh ngam an tam a, an in um tawk hlawm viau.