Season khata chak hnem ber Verstappen

Max Verstappen chuan car intlansiakna sang ber - Formula 1 huangah record duhawm a siam, season khat chhunga hnehna chang hnem ber a ni ta, kuminah intlansiak vawi 14 zetah hnehna a chang tawh a ni.

Michael Schumacher (2004) leh Sebastian Vettel (2013) te khan season khata chak hnem record an lo siam tawh, vawi 13 an chak. Max hian legend pahnih hi a nih rual phawt a, Pathianni zana tlan Mexico City Grand Prix-ah hnehna chang lehin record thar a siam.

Red Bull driver hi Lewis Hamilton hmaah a thleng. Mercedes driver Hamilton-a'n season kal laiah hnehna a la chang lo chhunzawm zel thung, intlansiak hmabak pahnihah vawi khat tal chak a tum ngei ang.

Kum 25 mi Verstappen chuan, "Kan tan chuan kum nuam leh chhinchhiah tlak bik a ni ngei mai, ni tina kan hun hman apiang mai hi a nuam em em vek," tiin a sawi a, inelna neih hmabak pahnihah pawh inthlahdah a tum chuang lo.

Hamilton-a'n F1 a luhchilh hnuah, season khatah ṭum khat tal hnehna a chang ṭhin, kuminah erawh he a record duhawm tak neih lai hi tawp mai thei dinhmunah a ding. Brazilian leh Abu Dhabi GP-ah chetsual a remchang lo ang.

Mercedes driver Hamilton chuan, "Hnehna chang turin ka dinhmun pawh a ṭha hman, mahse ka sawi tawh ṭhin ang khan Red Bull hian car an nei chak zawk a, chu chu a tawpa kan danglamna a ni," tiin a sawi.