Vertonghen-a'n Spurs a chhuahsan dawn

Tottenham Hotspur defender Jan Vertonghen chuan London club a chhuahsan tur thu instagram lamah a puang a, kum 33 mi defender hian season tharah chuan free transfer-in a duh lam club a pan thei dawn tihna a ni. 

Belgium tana vawi 118 inlan thei defender hian kum 2012 khan euro maktaduai 12 bawr velin Spurs hi Ajax aṭangin a zawm a, Premier League club tan inelna hrang hrangah match 315 khelin goal 12-a khungsak. PFA Team of the Year-ah ṭum hnih a lang chung leh Champions League Squad of the Season (2018-19)-ah a lang phak chungin Spurs tan nomawi chawi erawh a nei lo a, League Cup (2014-15) leh Champions League (2018-19) final a khel thung. 

Ajax tan a khelh laia kum 2012-a Dutch Footballer of the Year-a thlan lo ni tawh defender chuan, "Spurs-a ka hun hman chu a lo tawp dawn ta a, chhan tam tak vangin vawiin hi a lungchhiatthlak takzet a ni. 

"He hmuna ṭhian ka chhar thar te, he club enkawltu staff-te, stadium thar nuam tak leh fan-te ka ngai em em dawn che u a ni. Kha leh chen ka chunga in ṭhatna avang khan ka lawm a, hriatreng tlak sulhnu tam tak kan hnutchhiah a ni," tiin Spurs a mangṭha. Vertonghen hian Champions League khelh a duh thu a lo sawi tawh a, club hming tarlang lo mah se Spain emaw Italy lamah kal tura ngaih a ni.