Inter Miami leh Messi an sawi zawm - an inhnaih tak tak!
January 2018 khan David Beckham leh a thawhpuite chu MLS club nei tura phalna pek an ni a, English midfielder ropui ṭhin lawmpuitu zingah Lionel Messi a tel.
Messi hian Beckham lawmpui pahin, "Engtikah emaw chuan i club tana khel turin min la rawn be mai thei asin, sawi lawk thei tu nge awm?" tiin a sawi a, Beckham chuan a instagram account-ah Messi thusawi video hi a tarlang.
November 2022 a ni a, kan thu hriat chu David Beckham-a club Inter Miami leh Messi sawi zawm an nih thu a ni - Argentine forward hi Major League Soccer club Inter Miami zawm thei dinhmunah a ding.
Football fans tam tak chuan Messi inkhel lai en hi an la kham lo a, football level san berna Europe-ah khel reng se an duh. Mahse, kum 35 mi ni ve tawh Messi hian chawlh hmanga a zin fona USA lama a career tawp lam hman ve tawh hi a pawi ti lo.
Messi leh PSG
Barcelona legend Messi hian a club khelh mekna Paris Saint-Germain-ah season khat atan chauh contract a nei tawh a, French club hian contract thar ziak turin Messi hi an nawr na viau niin khawthlang media-te chuan an tarlang.
Hetihlai hian mittui nena Messi chhuahtirtu Barca pawhin, an club legend hi hruai let dan an ngaihtuah mek a, mahse, Argentina international hian Nou Camp-a kir tumna a nei lo nia sawi a ni.
Barcelona president Joan Laporta chuan, "Barca-a Leo career hi kan duh angin a tawp lo a, a lakah hian bat kan nei - Barca jersey ngei ha chungin a career tawp hmang se kan duh a ni," a ti.
Catalan club hian season tawp pawh nghak lo a, January transfer-a Messi lakluh hi an duh ang hialin Spanish chanchinbu lar Marca chuan an tarlang a, mahse, PSG hian Barca nena an inkar boruak avang ringawt pawhin hralh an duh lo ang.
Hei le Miami
Kum 35 ni tawh mah se Messi hian tun season-ah match 17 khelin goal 12 a khung leh der tawh a, assist vawi 13 a nei bawk - a theihna a la sang reng tih a lang chiang a, club tam takin an la duh hi a awm lo hran lo.
Beckham-te nena Inter Miami neitu Jorge leh Jose Mas te chuan Messi pa Jorge Messi chu rei tak inbiakna an neihpui tawh nia sawi a ni a, USA-ah Messi a inkhel mai thei!
Mahse, World Cup hma chu team pahnih hian inbiakna an neih chhunzawm rih dawn lo nia sawi a ni bawk a, Messi hian Argentina tana a rilru sawr bing phawt a duh niin a lang.
Qatar World Cup-ah Argentina hi champion ta chiah se, Messi tan MLS panna chance a sang lehzual sawt ang - Barca legend hian Europe-ah nomawi chawi theih a chawi kim tawh a, world champion a nih bawk chuan hahdam taka inkhelh ve a duh tawhin a rinawm.
Ta se...
PSG-in Messi an lakluh rualin hlawkna tam tak an hmu tel nghal a, Inter Miami hian Messi lalut ta ngat se American infiamnaa brand lar ber pawl an ni nghal dawn - a awih lo tan PSG thuneitute zawh theih a ni!
Marca-in an tarlan dan chuan PSG-in Messi an lakluh aṭanga kum khat chhungin euro maktaduai 700 an lakluh belh - Argentine chanchinbu El Economista chuan PSG-in Messi an lakluh hnuah sponsorship 10 vel an hmu thar a, heng hoin season khata PSG sum an pek zat hi €3mtd - €8mtd inkar a ni, tiin an tarlang.
PSG image rights leh ticket hralh zat ringawt pawh nasa takin a pung a, Argentine chanchinbu lar Diario Ole-in an tarlan danin Messi-a'n PSG a zawm hnuah Real Madrid chu French club aia jersey hralh hnem awmchhun an ni a, PSG jersey hralh zinga 60% chu Messi hming chuanna kawr a ni!
Messi-a'n PSG a zawm kar khan social media-ah French club follower chu kar khat chhungin maktaduai 5.6 in a pung nghal a, maktaduai 15-in a pung tawh. Sports consultancy firm Twenty First Group-a managing director AJ Swoboda chuan, "Khawvela infiammi langsar ber a ni a, eng nge MLS club pawh zawm se, league hmelhmang chu a tidanglam dawrh ang," a ti a, USA hian Canada leh
Mexico nen World Cup 2026 an thleng dawn bawk a, hemi hmaa US-a football lo tihlar zual nan Messi lakluh hi thil pawimawh tak a ni pakhat bawk.
Hmanah chuan...
MLS hian US-a football tihhmasawn tumin footballer ropui tak tak an lo lalut fo tawh a, a hlawhtlin pawh an hlawhtling ṭhin - khawvel nghawr nghing dawrh khawpa US pan hmasa ber chu Pele a ni a, Brazilian footballer ropui hian North American Soccer League tih hming a put laiin a pan.
Pele hian kum 1975 khan New York Cosmos a zawm a, nghawng pawh a nei na hle. Cosmos inkhel en ṭhin chawhruala fans 3,500 chu New York a chhuahsan dawn, kum 1977-ah meuh chuan 45,000 a ni tawh a, Giants Stadium-ah a inkhel en turin vawi thum ngawt fans 70,000 an pungkhawm - a hunlaia mipui awm zat ngaihtuahin a tam a, thil thleng zen zen lo a ni.
Brazilian footballer ropuiin US a pan hnu hian player langsar ber ber George Best, Johan Cruyff, Franz Beckenbauer, Gerd Muller leh midang tam takin US an pan ve zui a, Pele-a hnathawh a langsar hle.
Cosmos president Clive Toye-a'n Pele a sawm tirh khan, "Match tam takah chakin, nomawi tam tak i chawi tawh. USA-ah chuan a ram pum huapa an thinlung hneh a, football missionary nihna hun ṭha i nei dawn a ni," tiin a hrilh a, Pele hmin turin a tawk - Messi hmaa inchhawp chu hei tho hi a ni!
Beckham kha...
Pele hnua khawvel titi tling hat khawpa USA pantu langsar chu David Beckham a ni a, kum 2007 khan Los Angeles Galaxy a zawm - tunah chuan MLS club neiin, Messi thlem luh tum zingah a tel ta!
MLS commissioner Don Garber chuan, "Beckham vangin kan sumdawnna a ṭhang nasa. A hming chuanna LA Galaxy jersey kha 300,000 chuang kan hralh a, chu chu kum 2006-a LA Galaxy jersey hralh let 700 vel a ni!
"Club bungrua sumdawnnaa hralh kha a let hnih/thum velin a invawrh dawrh a, international TV sales kan neih hleihtheih loh pawh ram 100 ngawtah distribution awmin, Mexico leh Asia thlengin live-in kan pe chhuak a ni," a ti.
Pele leh Beckham ten USA-a football an tihhmasawn ang chiah hi Messi chungah beisei a ni dawn a, anni ai mahin a nghawng a lian zawk hial ang - engkim chiang tur erawhin World Cup zawh hun nghah phawt a ngai a, World Cup-in tunah erawh kar min dang rih e!