Thih leh dam kara ding India
T20 Cricket World Cup-ah India chuan vawiin chawhnu dar 1:30 hian Bangladesh an hmachhawn dawn a, a chak zawk tan semifinal kawng zau takin a inhawng ang. Men in Blue hian South Africa an hneh lo a, chetsual a thiang tawh lo - Bangladesh nen hian an point hmuh zat a inang chiah.
India an chungnung
India leh Bangladesh te hi T20 Cricket bikah hian ṭum 11 an inkhel tawh a, Men in Blue hian vawi 10 hnehna changin Tigers hi vawi khat chauh an chak. Team pahnih intawn hnuhnun ber hi November 2019 kha a ni a, India-in 2-1 in series an la.
T20 series hi India ramah khelh a ni a, Bangladesh hian match hmasa berah hnehna an chang. Inkhel hnuhnung pahnihah India chak chiang mah se vanduai thei an ni tih a chiang. Bangladesh hian Netherlands leh Zimbabwe an hneh tawh a, an khelh ṭhat ṭum leh India khelh chhiat ṭum a in nang fuh a nih chuan chak thei an ni tlat.
Mawhphurhna la ngam
India-in Pakistan leh Netherlands an hneh ṭumin Virat Kohli a che ṭha a, South Africa lakah erawh Suryakumar Yadav che ṭha mah se thlawptu ṭha a nei lo. Bangladesh laka awlsam taka hnehna chang tur chuan 'top order' an chet ṭhat a ṭul hle.
India opener KL Rahul-a'n tun season-ah run tam a la siam lo a, che ṭha lo langsar a ni. Captain Rohit Sharma pawhin a theihna angin a la khel chhuak pha lo. Kohli leh Suryakumar te an la rintlak a, amaherawhchu pangana/paruknaa awm tur nghet an la awm lo.
Pakistan an hneh ṭumin Axar Patel a che ṭha tawk lo a, Netherlands an hneh ṭumah erawh bowling lamah tha tlem a thawh. Proteas an hmachhawn ṭumin specialist batter Deepak Hooda a rawn lut thung a, run siam loin pavilion-ah a kir. Bangladesh nen hian Deepak Hooda hi chance an pe leh a nih chuan a chet ṭhat ngei a ṭul thung ang.
Bangladesh lam hi
India hi thih leh dam kara an awm avangin hlauhthawnna tur a awm a, chutihrualin Bangladesh laka hneh thei tur chuan Men in Blue hi an ṭha tawk. Tigers hian Proteas an ngam loh dan thlirin India laka beisei san an har a, thilmak thleng thei turin player ṭha erawh an nei.
Opener Najmul Hossain Shanto hi khelh ṭhat ṭumah chuan team chakpui thei a ni a, captain Shakib Al Hasan hi player rinlak ber a ni zawk. Bangladesh hi team chhe zawk an nih avangin pressure an nei dawn lo a, India tan erawh pressure a tam dawn - hei hian nghawng lian tak a nei thei ang.