Juve tana ṭha ber Europa League
Europe club-te tana football inelna sang ber chu UEFA Champions League a ni a, a dawttu chu Europa League a ni. Europe club liante an chet ṭhat loh avangin Europa League-ah club lian an ṭhahnem dawn a, tun dinhmuna Juventus tana ṭha ber pawh Europa League khelh a ni.
Zanin dar 1:30 hian Juventus hian Paris Saint-Germain an mikhual dawn a, group H inkhel dangah Maccabi Haifa-in Benfica an mikhual ve bawk ang. PSG leh Benfica te hian last 16 an lut chiang tawh a, group hmahruaitu nih an la tum dawn. Juve leh Maccabi Haifa ten Europa League khelh an tum thung ang.
Mualphona hliahkhuhna
Italian manager Massimiliano Allegri-a'n a vawi khat nan a club enkawl Champions League last 16 a luhpui dawn lo a, Europa League khel thei lo dinhmunah an ding bawk. Bianconeri defender Federico Gatti chuan, "Europa League hi kan khelh ngei ngei a ṭul," tiin PSG nena an inkhel a pawimawh thu a sawi.
Amaherawhchu Juve tan PSG hneh hi hna awlsam a ni dawn lo. September thla khan Paris-ah an inkhel tawh a, Lionel Messi telna team hi 2-1 in an chak. Chutihrualin PSG hian Italy-ah Juve hi an la hneh ngai lo - ṭum li an hmachhawn tawhah vawi thum chak loin ṭum khat an inhnehtawk.
Italian club hian kartawp khan Lecce 1-0 in an hneh a, hliam vangin player pawimawh Angel de Maria, Mattia De Sciglio te awm lo mah se PSG hmachhawn turin an inpeih. French club hian kartawp khan Troyes chu 4-3 in an hneh a, tlarhma an neih ṭhat zarah an chak a tih theih.
Lionel Messi, Neymar leh Kylian Mbappe ten goal khat ṭheuh an khung a, Juve tlarhnung tan ven uluk an ṭul dawn. PSG tan knockout stage-a team nem zawk hmachhawn theih nan group hmahruaitu nih a pawimawh a, Juve tan hna a harsa dawn. Mahse, mualpho hliahkhuh nan Europa League an khelh a ṭul avangin Allegri hote tan chhuanlam siam a thiang lo.
Juve innghahna Benfica
Juventus-in Benfica puihna an mamawh a, Portuguese club-in hmahruaitu ni turin Italian club puihna an mamawh ve bawk. Allegri hote hi Maccabi Haifa nen an point hmuh zat a inang mek a, head to head-ah an intluk chiah bawk avangin goal difference a pawimawh. Benfica-in Maccabi Haifa an hneh chuan Juventus tan chak kher a ngai dawn lo.
Maccabi Haifa coach Barak Bakhar chuan, "Benfica hi team ṭha tak an ni. Mahse, Paris coach hnenah Juventus min hnehsak turin ka ngen," tiin a sawi a, Europa League khelh an tum tih a chiang. PSG hian Juve hi an hneh a nih pawhin Israeli champion hian Europa League khel turin Benfica lakah point khat tal an hlawhchhuah ve a ṭul ang.