Wimbledon-in inrintawkna min pe - Djokovic

Season harsa tak hmangtu Novak Djokovic chuan, grass court inelna lian Wimbledon a khel thei khan a nunah nghawng lian tak a nei tih a sawi a, inrintawkna a neih leh theih chhan pawh niin a sawi.

Covid 19 laka invenna 'vaccine' a lak duh loh avangin, inelna lian pahnih Australian Open leh US Open-ah Djokovic hi a inlan thei lo. French Open khel mah se a champion lo a, major tournament pali zingah Wimbledon title chiah a la.

Player tam zawk tan chuan Wimbledon title chauh lak pawh hi hlawhtlinna a ni phak. Mahse, world number 1 hlui Djokovic tan chuan season ṭha a ni lo, tournament lian a khel hnem thei lo hian a nunah nghawng na tak a nei.

Serbian star Djokovic chuan, "Kumin tir lam khan Australia ramah boruak danglam tak ka tawng. Melbourne khawpui ka thlen hnuah thawn haw leh hnuhnawh ka ni a, ka tan chuan chona lian leh harsa a tling.

"A hnu lamah zawi muangin ka insiamrem a, ngaiawh leh mai chu thil harsa tak a ni ve phak. Hun harsa tak ka tawh laiin Wimbledon ka khel thei hlauh a, champion nomawi ka chawi bawk avangin beiseina thar pawh ka neih belh phah," a ti.

Tun kara khelh tur Paris Masters-ah Djokovic hi a inlan dawn, ṭum ruk ngawt a champion tawhna hmun a ni a, a inlan hnuhnung 2019 leh 2021 khan a champion, kuminah pawh rinkai ber a ni leh ang.

Djokovic chuan, "Tennis khel tur chuan taksa ringawt a pawimawh ber lo, rilru a paukhauh tel a ngai bawk. Kan thil tum hlen chhuak turin eng ang takin nge kan beih ngam tih hi a pawimawh lai chu a ni," tiin a sawi.