World Cup khel lo tur Pogba

Juventus midfielder Paul Pogba chuan Qatar World Cup a khel ve thei dawn lo, a khup hliam dam chho tawh mah se a dinhmun endik a nih hnuah chawlh a ngaih belh dawn a, Manchester United player hlui hi a beisei leh rin aia rei a chawlh a ngai dawn.

Kum 29 mi Pogba hian nipui transfer lai khan Old Trafford chhuahsanin Juve a zawm a, season thar inbuatsaihna nei hman mah se a inhliam. Old Lady tan tun season bikah match a la khel miah lo.

July thla khan a khup a hliam a, a tirah chuan zai kher loa enkawl tura tih a ni. Tun hnaiah training pawh a rawn zawm ve leh ṭan a, amaherawhchu a hliam dinhmun endik nawn a ni a, ngaiawh leh turin hun a la mamawh dawn.

Pogba-a agent Rafaela Pimenta chuan, "Thawhṭanni khan Paul Pogba dinhmun endik a ni a, a hliam vang hian a chawlh leh rih a la ngai dawn. Chawlh a ngaih leh tur thu sawi hi thil nuam lo leh hrehawm tak a ni," tiin a sawi.

France midfielder pawimawh N'Golo Kante pawh hliam vangin World Cup-ah a inlan thei dawn lo a, coach Didier Deschamps tan chuan lu haina tham a ni ang. Anni pahnih hi World Cup hnuhnung bera an champion theih nana mi pawimawh an ni phak.

World Cup 2022 an match hmasa ber atan France hian November 22-ah Australia an hmachhawn ang.