Murray-a'n US Open lam a thlir

Andy Murray chuan tun season chhungin tennis khelh theih ngei a tum ruh hle a, tun dinhmunah chuan August thla tawpa khelh tur US Open a tinzawn. A inlan thei ngei dawn em tih erawh a la chiang thei rih lo.

Grand Slam vawi thum champion tawh Murray hi hliam vangin a buai rei ta hle, tun hnai season thum chhung vel chu singles match a khel mumal thei lo. A khel bawr bakah hnungzang leh khup hliam vangin a buai deuh reng a ni.

Britain tlangval Murray chuan, "Thla khat liam ta velah kha chuan August tir lamah hian inkhelh theih ka beisei, tunah erawh ka theih hmel rih lo. Training chu ṭha takin ka nei thei reng tawh, inelna tak hmachawn tur erawh chuan hun a la mamawh deuh ang.

"Taksa bakah rilru leh engkim mai hi a inpeih vek a ngai, tournament boruak leh training boruak hi chu a danglam hle a ni," a ti. Thla hmasa khan Murray hian exhibition-ah doubles match a khel thei tawh. Murray bakah hian player langsar dang Roger Federer chu hliam vangin a chawl mek. Swiss star hi tun season chhungin a inlan dawn tawh lo a, season tharah beiseina sang zawk nen rawn kir leh a tum.