Japan-in World Cup squad an puang - Furuhashi a tel lo!

World Cup a hnai tual tual a, Asian football powerhouse Japan chuan squad an puang ta. Mahse, player 26 zingah Celtic player langsar Kyogo Furuhashi leh Reo Hatate an tel lo!

Hetihlai hian kum 36 mi Yuto Nagatomo leh kum 39 mi Eiji Kawashima te erawh squad-ah telh an ni a, Newcastle United forward hlui Yoshinori Muto leh Werder Bremen forward hlui Yuya Osako te erawh koh loh zingah an tel.

Player langsar zingah AS Monaco midfielder Takumi Minamino, Arsenal defender Takehiro Tomiyasu leh Real Sociedad midfielder Takefusa Kubo te pawh koh an ni a, Japan hi team tum châkawm an ni dawn lo.

Samurai Blue hi Group E-ah Germany, Spain leh Costa Rica te nen an awm ho dawn a, a hmuhnawm dawn - World Cup hi November 20-ah khelh ṭan a ni ang.

Furuhashi tel lohna
Hajime Moriyasu enkawlna hnuaia khel tur Japan squad-a Furuhashi lang phak loin sawi zui a hlawh hle. Kum 27 mi Furuhashi hian Celtic tan tun season-ah league match 10 aṭangin goal riat a khung tawh a, a nep lo.

Mahse, Moriyasu-a'n Japan tana inlan turin a ṭha tawk loah a ngai a, Scottish Premiership-a dah sang lo tih dawnin, Celtic tana khel tho, league match 16-a goal ruk khungtu Daizen Maeda a ko lawi si!

Furuhashi-a'n season hmasa khan Celtic tan Scottish Premiership leh League Cup-ah champion nomawi a chawi a, PFA Scotland Team of the Year (Premiership) ah lang hial mah se Moriyasu rin a hlawh tlat lo.

Celtic midfielder Reo Hatate hi nikum lawka J League Best XI-a lang thei a ni a, Celtic tan tun season-ah match 16 khela goal hnih khungin assist vawi hnih a nei a, mahse, Japan tana inlan turin a ṭha tawk lo.

Japan an ṭha
Goalkeeper Eiji hi ram tana vawi 95 inlan tawh niin, Ligue 1 club Strasbourg tana si ban nghaktu a ni a, a tawnhriat ringawt pawh a ṭangkai ang. Football ngainatu zingah defender ṭha Nagatomo chanchin inhrilh nawn a ngai lo.

Captain Maya Yoshida hi Schalke 04 tan Bundesliga-ah a khel mek a, Arsenal full back Tomiyasu pawh a rintlak viau. Borussia Monchengladbach tana defensive midfield leh centre back-a khel kawp thei Ko Itakura pawh a rintlak ang.

Midfield-ah Minamino a rintlak ang tih a chiang a, Bundesliga club Freiburg midfielder Ritsu Doan leh Real Sociedad tana hmun pawimawh chang phak Takefusa Kubo te pawh an nep dawn lo.

Tlarhma hi sawi thiam a har - Furuhashi koh a nih loh laia koh Takuma Asano hian VfL Bochum tan tun season-ah goal khat chiah a la khung a, Belgian club Cercle Brugge tana khel Ayase Ueda leh Celtic forward Maeda mawhphurhna a sang dawn.

Japan Squad
Goalkeepers: Shuichi Gonda (Shimizu S-Pulse), Daniel Schmidt (Sint-Truiden), Eiji Kawashima (Strasbourg).
Defenders: Miki Yamane (Kawasaki Frontale), Hiroki Sakai (Urawa Reds), Maya Yoshida (Schalke), Takehiro Tomiyasu (Arsenal), Shogo Taniguchi (Kawasaki Frontale), Ko Itakura (Borussia Monchengladbach), Hiroki Ito (Stuttgart), Yuto Nagatomo (FC Tokyo), Yuta Nakayama (Huddersfield Town).
Midfielders: Wataru Endo (Stuttgart), Hidemasa Morita (Sporting Lisbon), Ao Tanaka (Fortuna Dusseldorf), Gaku Shibasaki (Leganes), Kaoru Mitoma (Brighton), Daichi Kamada (Eintracht Frankfurt), Ritsu Doan (Freiburg), Junya Ito (Stade Reims), Takumi Minamino (AS Monaco), Takefusa Kubo Real Sociedad), Yuki Soma (Nagoya Grampus).
Forwards: Daizen Maeda (Celtic), Takuma Asano (Bochum), Ayase Ueda (Cercle Brugge).