I League fixtures-in MPL-ah nghawng a nei
Nimin khan I League fixtures tihchhuah a ni a, Aizawl FC-in RG Stadium-ah I League an khelh dawn avangin Mizoram Premier League fixtures pawh tihdanglam a ṭul dawn. Nimin vek khan Mizoram Premier League Board leh MPL Club hruaitute MFA Office-ah an inkawm khawm a, MPL season kal mek chungchang an sawi ho a ni.
Aizawl FC hian November 15, Thawhlehni hian I League match match hmasa berah Trau an mikhual dawn a; November 18, Zirtawpni leh Novmber 21, Thawhṭanni hian Gokulam Kerala leh Sudeva Delhi te an mikhual lehnghal ang.
I League hi RG Stadium-ah khelh a ni dawn a, Lammual lamah International Tourism Mart hman a nih dâwn avangin MPL fixtures awm sate siam rem a ṭul phah. RG Stadium chei ṭhat avangin October 31 leh November 1-a khelh tur MPL9 round 10 chu inkhelh hun sawn a ni tawh.
MPL Board secretary Lalrawngbawla chuan, "MPL hi a boruak sang chin kan thleng chho dawn a, mipui en theih dan kawng kan dap a ṭul. I League leh chhan hrang hrang vangin harsatna nei mah ila club hotute nena kan inbiak hnuah harsatna hi kan chingfel theiah kan inngai. Fixtures pawh a ṭul angin club hriatpuinain kan siam rem thei a ni," tiin Vanglaini a hrilh.
Tunah hian MPL round kua khelh a ni tawh a, round nga bakah semifinal leh final khelh tur a la awm. MPL hi ruahman lawk ang chuan December 6 hian RG Stadium-ah final khelh tur a ni ang.
MPL Fixtures
Round 11 - Lammual
November 3, Ningani
Electric Veng FC 11:30 PM Chanmari FC
FC Bethlehem 2:30 PM FC Venghnuai
November 4, Zirtawpni
Mizoram Police FC 11:30 PM Chhinga Veng FC
Aizawl FC 2:30 PM Chawnpui FC
Round 10 - RG Stadium
November 7, Thawhṭanni
Chanmari FC 11:00 AM FC Venghnuai
Chawnpui FC 1:30 PM FC Bethlehem
Aizawl FC 4:00 PM Mizoram Police FC
Chhinga Veng FC 7:30 PM Electric Veng FC
Round 12 - RG stadium
November 10, Ningani
Aizawl FC 12:00 PM FC Bethlehem
Electric Veng FC 3:00 PM Mizoram Police
November 11, Zirtawpni
FC Venghnuai 12:00 PM Chawnpui FC
Chhinga Veng FC 3:00 PM Chanmari FC
Note : Round 13 leh Round 14 hi a hun leh ni la tihchian theih a la ni lo. Semifinal first leg hi November 28-29 a khelh tur a ni a, second leg hi December 1-3 a khelh tur niin December 6-ah final khelh a ni ang.