Rockets hnehtu Clippers

Nimin zing NBA regular season inkhelah, season bul ṭan fuh lo tak mai Houston Rockets an chak lo chhunzawm. Rocket hian kumina an vawi sarih tlawmna ni turin Los Angeles Clippers chu 95-93 in an ngam lo, an inthlauhna hi point hnih chauh a ni.

Crypto.com Arena-a inkhelah, point 35 neitu Paul George chu player ṭangkai leh thawh hlawk bik a ni. Ani bakah hian Ivica Bubac (16 points) leh Marcus Morris Sr. (11) te an ṭangkai bawk a, team ṭha pangngai lakah an chak.

Match riat an khelh zinga vawi sarih zetah Rocket an tlawm ta a, insiamṭhat an ngai takzet. Mimal langsar an nei hleithei lo, bench aṭanga lut Kenyon Martin Jr. chuan point 23 a nei thei a, point 14 neitu Alperen Sengun-a'n thlawp ve bawk mah se chak nan a tawk zo lo.

Thawhṭanni khan Los Angeles Lakers chu an mangchhia aṭangin an harh chhuak thung. A zawna match nga an tlawm hnuah Lakers hian Denver Nuggets chu 121-110 in an hneh a, kumina an chak vawi khatna a ni.

Kum 37 mi LeBron James chu mi bik a la ni reng, point 26 neiin an chakna hnar a ni. James bakah hian point 23 neitu Anthony Davis a langsar bawk a, season bul an ṭanna mangchhia aṭangin an harh.

Nuggets tan bench aṭanga lut Russell Westbrook-a'n point 18 a nei a, Nikola Jokic pawhin point 23 a nei ve bawk. Mahse, chak duha tuihal Lakers lakah an dingchang zo ta lo.

Lakers coach Darvin Ham chuan, "Ka nihna dik tak kan fiah a ngai a, tunah chuan kan fiah ta niah ka ngai. Khawvel leh media hmaah chauh a ni lo, kan nihna tak hi basketball court chhungah zawk kan fiah zel tur a ni ang," tiin a sawi.