Lukaku a inhliam nawn

Inter Milan striker Romelu Lukaku chu a hliam a dam ṭan chauh a, tunah malpui hliam vangin a chawlh a ngai leh dawn ta. World Cup hmain chawlhkar thum pawh a awm tling tawh lo, a dinhmun a chiang lo ta hle.

Chelsea aṭangin Lukaku hian loan hmangin Inter hi a zawm. Hlawhtling taka a khelh tawhna San Siro-ah beisei angin a la tal na thei lo, hun rei tak a chawlh hnuah Champions League a rawn khel ve leh a, kartawp khan Serie A a khel bawk.

UCL leh Serie A a khelh hnuhnung pahnihah hian, khelmual chhunga a hun hman rei zawng chu minute 29 chauh a ni. Mahse, Italian club lamin thuchhuah an siam tharah chuan an striker hi a chawlh leh rih a ngai dawn.

Inter chuan thuchhuah siamin, "Romelu Lukaku hriselna dinhmun endik a ni a, a malpui vei lamah hliam a tuar. A dinhmun tur engkim sawi nghal theih a la ni lo a, ni eng emawti chhung chu kan ngaichang ang," an ti.

Serie A club tan Lukaku hliam hi a pawi a, an ram Belgium tan pawh chanchin lawmawm lo tak a ni ang. Red Devils (Belgium sawina) tan match 102 aṭangin goal 68 a khung tawh a, ani aia khung hnem an awm lo.

Belgium lam chuan Lukaku hi World Cup-ah chhawr theih ngei an beisei thu an sawi ve nghal. Coach Roberto Martinez chuan, "Belgium team lamah chuan ani hi chu a hmun ruak a zau dawn lutuk a, luah khah theih a ni lo ang.

"Team tin hian player hlu bik an nei. Argentina chuan Lionel Messi an nei, Croatia pawhin Luka Modric an nei bawk. Keini team pawhin Lukaku, Kevin de Bruyne leh Thibaut Courtois kan nei a, an hmun ruak hnawh khah theih a ni lo," a ti.

Season hmasa tawp lamah khan kerek hliam vangin a lo na tawh bawk a, malpui hliam vanga a buai chhunzawm leh avangin ngaiawh tur chuan hun a mamawh rei dawn - World Cup a khel a nih pawhin tun hma lama a vanglai ang a ni kher lo mai thei.

Belgium hi FIFA ranking-ah pahnihna an ni mek. World Cup-ah chuan group F-ah an awm a, an match hmasa ber atan November 24 hian Canada an hmachhawn ang, chumi hnuah Morocco leh Croatia te nen an inkhel leh ang.