T20 Cricket World Cup ; England leh Sri Lanka ten beiseina chhi nung

T20 Cricket World Cup-ah nimin khan Super 12 group 1-ah England-in hmahruaitu New Zealand chu 21 runs-in an hneh a, Gabba-a inkhel result hian World Cup boruak a tih nun phah hle. Match khat chauh khelh tur a awm tawh a; Black Caps, Australia leh Three Lions ten point nga vek an hmu - pahnih tan chauh semifinal-ah hmun a awm.

Inkhel dangah Sri Lanka-in Afghanistan wicket rukin an hneh ve bawk a, Asian champions tan semifinal luh beiseina a inhawng ve bawk. England leh Sri Lanka hian November 5, Inrinni hian group match hnuhnung ber an khel ang.

Gabba-ah England
Chak mamawh England ṭhumvawrah an vannei a, captain Jos Buttler-a'n bat hmasak a thlang. Dinhmun harsaah Buttler-a'n captain mawhphurhna a la zui a, ball 47-ah 73 runs a siam. Buttler-a dinpui Alex Hales-a'n 53 runs a siam ve bawk a, player pahnih hian over 10.2-ah 81 runs an siam hman avangin dinhmun ṭha England an dah.

Three Lions hian over 20-ah 179 runs an siam a, wicket ruk an hloh. New Zealand tan target 180 a sang a, an bat hma hauhin chak a harsa dawn tih a lang. Harsatna belhchhah turin opener Finn Allen (16) leh Devon Conway (3) ten run tam an siam lo.

Mahse, hun harsaa khel ṭha ṭhin Kane Williamson-a'n 40 runs a rawn siam a, Glenn Phillips a che ṭha lehzual. Phillips hian ball 36 lekah 62 runs a siam avangin chak beiseina an nei hman a, mahse England bowler Sam Curran, Chris Woakes leh Mark Wood te an che ṭha - substitute Chris Jordan-a'n ṭha takin ṭum hnih a rawn man bawk.

New Zealand-in over tawp lamah chak beiseina ngah tawh lo mah se net run rate (NRR) ṭhat nan theihtawp an la chhuah a, over 20-ah 159/6 an siam thei a, Three Lions-in 21 runs-in hnehna an chang.

Tu nge tling dawn?
New Zealand-in England hneh lo mah se semifinal lut turin an dinhmun a la ṭha. Kane Williamson-a hote hian group match hnuhnung berah Ireland an hmachhawn dawn a, NRR a ṭhat sa bawk avangin hnehna an chang a nih chuan semifinal an lut ang.

November 4, Zirtawpni chawhnuah Australia-in Afghanistan an hmachhawn dawn a, inelna thlengtu Aussies hi an NRR a ṭhat loh avangin chiang taka an chak a ṭul. Aussies hian hnehna an chang a nih pawhin England leh Sri Lanka result an nghah a la ṭul dawn.

Black Caps leh Aussies te hi an chak a nih chuan Sri Lanka semifinal beiseina a tawp ang a, England tan a sang pali zinga inhlangkai turin tla tawh Sri Lanka hi an hneh a ṭul dawn. Australia an chak chian viau chuan Three Lions tan pawh Sri Lanka sawp ve a ṭul thung ang.

Sri Lanka erawh Ireland emaw Afghanistan emaw kutah an innghat a, ram pakhat zawk zawk hi an chak a nih chuan Asian champion hian England an hneh chuan semifinal an lut thei dawn a ni.