Stefano Pioli tan contract thar

AC Milan coach Stefano Pioli chuan contract thar a ziak. Pioli hian season hnih daih contract a ziak a, an inremna ang chuan kum 2025 June thla thleng Milan hi a enkawl chhunzawm dawn tihna a ni.

Kum 57 mi Pioli hian 2019 aṭang khan Milan hi a enkawl ṭan a, a hun hmasa lamah rin a hlawh tawk lo. Ban mai theih dinhmunah a ding reng a, a hmun ruak luah tur thlenga biak a ni hman.

Mahse, mak tak maiin a hna a chelh chhunzawm a, season hmasa a enkawl zawh leh meuh chuan Serie A champion a nihpui der. Hun rei tak chhung Juventus leh Inter Milan ten ro an rel tawhna hmunah Milan chu ropuina a chanpui.

Italian club hlun Milan chuan thuchhuah siamin, "Serie A nomawi min chawipuitu, hmun ropuia min dinchhuah puitu Stefano nen kan thawk dun zel dawn, inremna kan nei thei hi a lawmawm hle," an ti a, coach chungah rinna an nghat.

Pioli hian tun hmain nomawi chawi a la nei ngai lo, season hmasa erawh Serie A champion a nih avangin Serie A coach of the year atan thlan a ni bawk a, a tan chuan mumang rama chen ang a ni ngei ang.

Season kal laiah Milan hi league table-ah pathumna an ni mek a, hmahruaitu Napoli aiin point rukin an hniam zawk. An nomawi kawl lai humhim tur chuan thapui an thawh a ngai tawh a, midang chetsual an chan tel a ngai dawn bawk.