Max hian tun aia fak nasat a phu - Horner

Max Verstappen-a'n vanglai a hmang mek a, intlansiak hmabak pali nei chungin Formula 1 champion a ni fel der tawh. Car intlansiakna sang berah hian, season khata chak hnem ber (14) record a siam thar ta bawk - intlansiak hmabak pahnih an la nei zui.

Red Bull driver hian khawvel hmun hrang hrang aṭangin fakna thu a dawng hnem a, an team hotupa Christian Horner chuan an driver hi nasa taka fak tlak a nih thu a sawi a, media lam pawhin uar zawkin tarlang se a duh thu a sawi bawk.

Horner chuan, "Mi bik leh danglam tak a nihzia hi a takin kan hria. A nihna takah chuan a phu tawk ang fakna ṭawngkam hi a dawng lo ni tein ka hre ṭhin, tun hma lama thil thleng tawhte kha a rawn khum pawp pawp a ni a, a sulhnu hi a nep lo hle," a ti.

Tun season-ah Max hian point 416 a hmu tawh a, hei pawh hi record thar a ni. Kum 2019 khan Lewis Hamilton chuan point 413 hmuin record a lo siam tawh a, kuminah a rawn khum - a khumna point zat hi a la belhchhah ngei pawh a rinawm.

Red Bull team boss chuan sawi zawmin, "Intlanisak vawi 20 kan hmachhawn chinah chak hnem ber record a siam fel der tawh a, henga hnehna chante hi awlsam tak a ni lo. Elpui hriam leh ṭha tak tak kara chak a ni.

"Chuvangin Max-a hian awlsam takin ropuina hi a chang lo a, a hnathawh leh sulhnu hi kan fak dawn a nih chuan thu uar lutuk a awm thei lo ang," tiin an driver chu a dah sang vet vet hle.

Tun season tawp hmain Brazlian Grand Prix leh Abu Shabi Grand Prix te an la tlan chhunzawm leh dawn a ni.