Butt-a'n Neville a thlak

Gary Neville chu Salford City chief executive hna a chelh aṭangin a chawl a, Manchester United tana a khelhpui ṭhin Nicky Butt-a'n a thlak. Man United captain hlui Gary hian Salford-ah hian kum riat chhung chief executive hna a chelh a, Sky Sports-ah pundit hna thawk pahin 'Hotel Football' a enkawl pah bawk.

Hotel Football hi kum 2015-a hawn kha a ni a; Old Trafford bul hnaia awm niin Ryan Giggs, Paul Scholes, Nicky Butt, Phil Neville leh Gary Neville te sak a ni.

Gary chuan, "Club hi nasa taka a ṭhan avangin club hian hun zawng zawng pe thei a mamawh a, Nicky hi he hna chelh tura duhthusam a ni," tiin a sawi. Nicky hi March 2021-a head of first-team development hna a ṭanga a chawlh hnuah a awl rih a ni.

Salford City hi League Two club an ni mek a, league table-ah 10-naah an awm. Kum 2014 khan Man United player hlui Nicky Butt, Ryan Giggs, Gary Neville, Phil Neville leh Paul Scholes te chuan neitu nihna 10% ṭheuh an lei a, a bak zawng chu Singaporean sumdawng hausa Peter Lim ta niin kum 2019 khan David Beckham-a'n 10% share a leisak leh bawk.