Ronaldo hoin Juve an champion

Awm lo aṭangin bul an ṭan tlang a, a tawpah erawh hlimna, lawmna leh chawimawina nen hnu an khar ṭhin - a zawnin season kua zet a ni ta. Hetiang dinhmun leh thawnthu hi Juventus player-te chauhin an neih chu a ni. 

Juventus chu a zawna a vawi kua nan Serie A champion an ni. Cristiano Ronaldo-a'n hlawhtlinna an chan chu a hmuna en ve thei lo 'Fans' tan a hlan a, manager Maurizio Sarri tan league nomawi hmasa ber a nih avangin a hlu zual bik.

Pathianni zan khan Allianz Stadium-ah Juve hian an mikhual Sampdoria chu 2-0 a hnehin 'Scudetto' an kawl lai chu an humhim tih an nemnghet. League match khelh hmabak pahnih an la neihah an elpui dangte tan umphak theih an ni tawh lo.

Football ram ropui - England, Spain, Germany, Italy leh France-ah Juventus hi mahni ram league nomawi chawi hnem ber (36 titles) an ni. Spanish club lian Real Madrid chuan league nomawi 34 an nei tawh thung.

Serie A match an khelh hnuhnung zawkah khan chak ni se Juventus hi an champion fel tawh ang, mahse Udinese lakah an tlawm. An hun ṭha vawi hnihna erawh an bawhpelh tawh lo chiang hle, manager Sarri-a'n a naute a zilh 

ṭha tih a hriat.

Miralem Pjanic-a'n goal zawnah freekick a pet dawn emaw an tih laiin Ronaldo a pe thut; Portuguese forward hian laklawh nei miah loin ball rawn kal chu a chhuih lut - season kal laia a league goal 31-na chiah a ni. Turin club tan Federico Bernardeschi-a'n an goal hnihna a khung a, mikhual midfielder Morten Thorsby chu minute 77-naah yellow card pahnihna hmuh vanga hnawhchhuah a ni, goal hnih an phurh tawh sa bawk avangin player tlem zawka khel Sampdoria an tho chhuak lo.

European league lian panga - Premier League, La Liga, Serie A, Bundesliga leh Ligue 1-ah a zawna vawi kua champion thei an la awm ngai lo, tunah Juve-in record an siam. League lian ni lo lamah chuan Celtic (Scotland) leh Ludogorets Razgrad (Bulgaria) te chuan hetiang dinhmun hi an lo luah tawh thung.

Bayern Munich pawhin Bundesliga title tun hnaiah a zawnin vawi riat an la, champion zawn rei lamah Juve nihrual hman mah se Italian club ropui hian German club ṭha hi an kalsan leh ta rih - season tharah pawh anni pahnih hi champion tura rinkai an ni leh nghal.

Lyon chuan 2002-2008 chhung khan Ligue 1 nomawi a zawnin vawi nga an la; Real Madrid-in a zawnin La Liga title vawi nga an la tawh bawk. England ramah chuan Huddersfield, Arsenal, Liverpool leh Manchester United te chu a zawna league champion vawi thum ni thei an ni ve bawk.

Cristiano Ronaldo-a'n a vanglai a liam hnuah chona thar hmachhawn duhin Juventus a pan, kum 35 mi a nih hnuah pawh midang chunga leng a la ni tho. Champion team zinga tel satliah a ni lo; Turin club tan 'Changtupa' a la ni.

Real Madrid forward hlui hian season kal laiah league goal 31 a khung tawh, Sampdoria lakah khung belh theihna hun ṭha nei mah se penalty a hlah. Serie A Golden Boot a chuhpui Ciro Immobile (34 goals) umphak turin match hnih khelh tur a la nei dawn.

Ronaldo chuan, "Ka tan chuan Serie A nomawi pahnihna a ni, club ropui takin sulhnu a siamna kawnga ka tel ve thei hi ka lawm. Kan hlawhtlinna hi min ṭantu fans zawng zawng tan ka hlan, mahni insengsoa club hmangaihtute an ni. "Italian champion nih hi a awlsam lo, inpekna, dawhtheihna leh tihtakzetna nen a tawp thleng theihtawpa kan beih hnuah kan hlawhchhuak chauh. Hlawhtlinna kan chan hi Italy ram tan a ni," tiin a sawi a, Juve thlawptute chungah lawmthu a sawi bawk.

Ronaldo hian Manchester United tan Premier League nomawi pathum, Real Madrid tan Spanish La Liga pahnih leh Juventus tan Serie A pahnih a chawi ta. Tunah chuan Italian club-in an lakluh chhan lian tak pakhat Champions League lama hlawhtlin leh a tum ang.

Professional footballer a ni lo a, football erawh a khel ve ṭhin. A hun hmasa lamah chuan coach ni loin 'banker' a ni daih. Tunah erawh Maurizio Sarri chuan Juventus chu Serie A champion a nihpui ta. Sarri chuan, "Italian league hi chuan boruak danglam a nei, hlawhtlinna chan hi a awlsam ngai lo. A zawnin hun rei tak Juve-in ro an rel tawh a ni mai thei, hriat tel ngai chu season tin mai hi a hautak belh zel. Chiang taka ka sawi duh chu a awlsam lo tih hi a ni.

"Manager chuan team kan kaihruai a, kalphung tur leh inkhelh dan tur kan ruahman a ni ber. Khelmual chhunga a ti hlawhtlingtu chu player an ni, anni hian match khelh hmabak pahnih nei chungin hlawhtlinna min chan pui, tun hi hlima lawm hun a ni," a ti.

Italian manager hian team lian lo a enkawl nual tawh a, 2015 khan Napoli enkawlin inkhel hmuhnawm an chhawp chhuak. Nomawi chawi lo mah se Chelsea thuneitu lamin an hmu tai a, an lalut. Blues tan Europa League a chawi hnuah Italy lamah a kir. Turin khawpuiah hian hna a awlsam bik lo. Coppa Italia final-ah Napoli an ngam lo a, league-ah pawh hian Inter Milan leh Lazio ten an nek buai ve reng, a tawpah erawh squad an neih chhah chhawr ṭangkaiin hlawhtlinna an chang a ni. Juve tan league nomawi hi thil thar a ni tawh lo a, an duh leh thlakhlelh ber chu Champions League a ni. Last 16 first leg-ah Lyon 1-0 in an ngam lo, second leg-ah thawh chhuah an tum dawn. UCL-ah hian an hlawhtling a nih chuan Juve lunglawm a kim ang.