Andrea Pirlo-a'n Ball boot a khai ta

Footballer hmuhnawm leh 'cool' tia an sawi ṭhin Andrea Pirlo chuan khawvel hriat a hlawhna football khelh a chawlhsan thu a puang. Kum 38 mi Pirlo hian Major League Soccer club New York City leh Columbus ten November 6-a match an khelh zawh hnuah boot a khai thu hi a tichiang.

Italy legend hian October thla khan tun season bak a inkhelh tawh loh tur thu hi a sawi lawk tawh a, professional match hnuhnung ber a khelh zawh hnuah Pirlo chuan, "New York City tana ka hna a zo a ni ngawt lo a, ka football zinkawng chu a tawp zui ve nghal bawk," tiin a chawlh thu a sawi.

Ram tan match 116 khela 2006 FIFA World Cup chawitu Pirlo hian Twitter kaltlangin a inkhelh hun chhunga a khelhpuite bakah amah kaih­hruaitute chungah a lawm thu a sawi a, tun hma lama a khelh tawhna Juventus chuan "Mifing chungchuang" tiin an player hlui chungchang hi an ziak hial.

New York City manager Patrick Vieira pawhin, "Football thlak danglamtu" ti hialin Pirlo a dahsan thu a sawi. Pirlo hian professional football hi kum 22 chhung a khel a, an ram tan inelna ngaihhlut ber World Cup a chawi avangin Italy mipuite thinglungah chuan engtikah mah a hming hi a dai ngai tawh lo ang.

Inter duh loh Milan tan
May 19, 1979 khan mipui sing khat pawh awm tlin lohna Flero, Italy-ah Pirlo hi a piang a, football a khelhtirh chuan attacking midfielder niin an khaw club Brescia aṭangin bul a ṭan. Brescia hi Serie B nomawi chawi puiin kum 1997 khan Serie A an inhlangkai - a season lehah chuan Inter Milan a pan thung.

Inter Milan-in player ṭha an ngah a, feet 5 leh inches 9-a sang Pirlo kha a chet ran tawk loh bawk avangin San Siro-ah khelhna hmun a chang lo; Inter aṭang hian Reggina leh a bul ṭanna Brescia-ah loan hmanga chhuahtir a ni. Inter-in an player chhawr duh loh hi an hmelma AC Milan lamah kaltir an pawiti lo.

Italian manager Carlo Ance­lotti-a'n attacking midfielder ṭhin kha a pawt hnung a, a position tharah hian hun rei lote chhungin a khel thiam nghal. A ṭhian ten an khingpui goal an nawr kawngah a pui thei tho a, chutih rualin an hmelmate ball chhuhsak thei tak a ni tel bawk - season hnih a liam meuh chuan Inter duh loh kha khawvel huapa larplaymaker a ni der tawh.

Milan tan hian Serie A title pahnih (2004, 2011), Cham­pions Leagues (2003, 2007), UEFA Super Cups (2003, 2007), FIFA Club World Cup (2007), Supercoppa Italia (2004) leh Coppa Italia (2003) te a chawi. Milan tana a contract a hman zawh hnuah Juventus zawmin Turin club hi a zawnin league no­mawi vawi li a chawi pui bawk.

World Champion
Pirlo hi kum bitliah inelna lamah Italy tan a inlan kim vek a, 2000 UEFA European Under 21 Championship-ah khan Golden Player leh Top Scorer a ni. Milan tana a vul hnuah senior tana khel tur chuan koh ṭan a ni thung. Kum 2002 khan a vawi khat nan koh niin kum 2015-a hun tawp a hman meuh chuan match 116 khelin goal 13 a khung hman a ni.

The Greatest Show on Earth tia an sawi mai ṭhin FIFA World Cup 2006 khan Pirlo hi ram tan a feh chhuak, Germany-a neih inelna lianah hian Pirlo chuan khawvela midfielder thiam bik a nih zia a pho lang; Man of the Match atan vawi thum thlan niin ani aia he chawimawina dawng hnem an awm lo - nomawi inchuhna inkhela France an hneh ṭumin khawvel player ṭha leh langsar karah Man of the Match a ni hial bawk.

Mihrang a liam
Ball pet thiam bakah hun khirhkhan leh chep tak kar pawha chiai ve ngai lo a nih vanga ṭan hlawh Pirlo hian European football lama a thiamna a hman hnuin kum 2015 khan MSL lam a hawi a, England midfielder Frank Lampard leh Spain striker David Villa te khelhna New York lamah kalin Arsenal captain hlui Patrick Vieira kaihhruaina hnuaiah an khelho - a hun hnuhnungah nomawi chawi lo mah se playoff khel turin a hruai kai a ni.

MSL club New York chuan thuchhuah siamin, "Andrea-a'n kum hnih leh a chanve chhunga New York City FC tana a tha thawhte avangin lawmthu kan sawi, career duhawm tak a hman hnuah a chawlh hun a thleng thei hi kan lawmpui," tiin an midfielder an thlah.

Arsenal leh France mid­fiel­der hlui Vieira chuan, "Holding midfielder ka hmuh tawh zingah chuan khawvela ṭha berte zinga mi a ni. A khelhna ṭhin hi tun hma chuan khingpuite lo titlu paha ball chhuhsakna hmun tura ngaih a ni, Pirlo erawh chuan inkhel thununna hmun atan a hmang a, tunah chuan playmaker awmna hmun tura ngaih a ni tawh," tiin Pirlo chu football hmel hmang thlak danglam thei khawpa thiam a nih thu a sawi.