FIFPro an inhnukdawk

Khawvela football hmanga ei­zawng player intelkhawm pawl FIFPRO chuan FIFA transfer system thlak danglam turin FIFA khing mah se an khinna hi an hnukdawk.

FIFPRO hi kum 2015 daih tawh khan European Commission-ah an zualko a, mah se FIFA nen transfer chungchangah kum ruk chhung thawkho tura thuthlung an siam takah chuan an khinna hi an hnukdawk a ni.

FIFPRO leh FIFA hian pawl pahnih inkara thawhhona ṭha zawk a awm theih nan hma an la ang a, transfer system uluk taka zirchiang turin taskforce din a ni dawn bawk - he taskforce hi FIFA, FIFPRO, European Club Association, World Leagues Forum, ram tin FA, member associations leh professional football stakeholder-te awmna meeting chuan a din dawn a ni.

Football player pawl FIFPRO president Philippe Piat chuan, "FIFA-in kan thusawi ngai pawimawha hma an la hi ka lawm a, kum 2001 hnua football transfer dan chu thlak danglam a ni thei dawn a ni. Khawvela league hausa tak tak ten duat taka player an enkawl laiin ṭhenkhatah chuan duat an hlawh lo em em thung," tiin a sawi.