West Ham manager thar David Moyes
Premier League club West Ham chuan an beisei ang result an neih theih loh avangin coach Slaven Bilic an ban a, kum 49 mi hmun ruak luahlum tur hian Manchester United boss hlui David Moyes an lalut zui - Hammers hi Premier League relegation zone-ah an awm mek a, Moyes hian season tawp thleng a enkawl phawt ang.
Hammers joint chairman David Sullivan chuan, "Kan mangchhia aṭanga min kaitho thei tura kan beisei a ni. Manager tawnhriat nei ngah leh Premier League-a mikhual lo kan mamawh a, David-a chungah hian kan rinna kan nghat ta a ni," tiin season hmasaa Sunderland relegate puitu manager an lak chhan a sawi.
Moyes-a hmabak
Premier League table-a 18-na dinhmun luah mek Hammers hian league match 11 an khelh tawhah vawi hnih chiah chak hmel an la hmu a, vawi ruk tlawmin vawi thum an khingpui an inhnehtawkpui - an league match hmasa pathumah an tlawm vek. Bilic-a'n nipui transfer laiin pound maktaduai 42 a seng a, Stoke City forward Marko Arnautovic chu club player manto ber ni turin pound maktaduai 20-in a lalut a, Manchester United striker hlui Javier Hernandez chu Bayer Leverkusen aṭangin pound maktaduai 16-in a lalut bawk.
Moyes-a hna hmasa tur chu player-te rilrua inrintawkna tuh a ni a, an player manto te hman thiam dan ngaihtuah chhuah a ṭul bawk. Moyes hian a hna hmasa ber atan November 19 zanah Premier League match khel turin Watford a lenchilh ang a, Leicester City leh Everton a hmachhawn zui bawk ang - December-ah Manchester City, Chelsea leh Arsenal an hmachhawn dawn a, fiahna a hautak dawn.
Moyes-a sulhnu
Preston North End aṭanga a managerial career ṭantu Moyes-a'n Everton-ah a hun duhawm ber a hmang anga sawi theih a ni a, Goodison Park-ah kum 11 hun a hman chhungin LMA Manager of the Year-ah ṭum thum 2003, 2005 leh 2009 te khan thlan a ni hman. Season 11 chhung Toffees a enkawl chhung hian top eight-ah season kua chu hun a hmanpui thei.
Everton chhuahsanin Manchester United a pan a, Sir Alex Ferguson hmun ruak erawh a luah zo lo hle. A hunlaia Premier League champion-ah hian kum ruk cham turin contract ziak mah se thla 10 hnuah ban a ni a, table-ah pasarihna an ni. La Liga-ah Real Sociedad a pan a, mahse Spanish club hian kum khat hnuah an ban leh. July 2016 khan Sunderland a pan a, mahse May 2017 khan Black Cats hi a chhuahsan - table mawngphaha awm chungin Championship-ah an tla thla.
Moyes-a thukhawchang
Premier League Manager of the Month chawimawina vawi 10 lo dawng tawh coach chuan, "Hammers ṭantute nena intawn hlan ka nghakhlel takzet a ni. Anni nena stadium-a kan inhmuh hun tur nghakhlel takin ka thlir a, he team tana an theihtawp chhuaha min ṭawiawm hun tur ka thlir reng. An mi ṭawiawmna ka mamawh a, kan lama ṭang turin kan mamawh vek che u a ni," tiin a sawi.
Everton a enkawl laia UEFA Champions League, Europa League leh FA Cup final khelhpuitu coach chuan an hmabak a hautak tih hre rengin, "Tunah chuan kan kutah hna hautak em em a inchhawp a, mahse kan vaia kan ṭanrual vek chuan hna ropui tak kan thawk thei ang tih ka chiang a ni," a ti a, Hammers fan-te tan beiseina a chhawp sak - a ti hlawhtlin theih dawn leh dawn loh chu hunin a hril ang.