Mary Kom-i'n final a lut

Asian Boxing Championship khelh mekah India nula Mary Kom chuan nimin khan final a lut. Veteran Sarita Devi, Sonia Lather leh Lovelina Borgohain te chuan semifinal an lut bawk a, an result kan hre hman lo thung.

Ho Chi Minh City, Vietnam-a inelna neihah Mary Kom chu 48kg category-ah inlanin Japan nula Tsubasa Komura chu 5-0 a sawpin final a lut a ni. World champion vawi nga ni tawh Kom hian a vawi nga nan Asian Boxing Championship-ah medal a la ngei dawn tih a chiang ta.

Olympic bronze medallist Kom hi 48kg category-ah hian pakhatna a nih chuan he inelna huang bikah hian Asia huap inelnaah a gold medal hmasa ber tur a ni ang - tun hma lam chuan 51kg category-ah a lo hlawhtling tawh a ni.

Quertfinal lamah world champion ni tawh Sarita chuan Uzbekistan boxer Maftunakhon Melieva chu 5-0 a hnehin 64-kg category quarterfinal a paltlang. Sarita hian tunhma lamin Asian Championship-ah medal panga a la tawh a, tun ṭumah pawh hian India tan medal dawn beiseina a tling phak.

Kg-57 category lamah World Championship silver medalist Sonia chuan 3-2 in Nazym Ichshanova a hneh a, Uzbekistan boxer Yodgoroy Mirzaeba nen final luh inchuhin an inhnek zui ve leh thung.

Indian nula dang, 69-kg category lama inlan Lovelina Borgohain chuan Erdenetuya Enkhbaatar hnehin a thiam pali zingah a tel bawk a, Assamese boxer hian Valentina Khalzova a hnek zui ve leh dawn bawk a ni.