AFC U19 Qualifier ; India an chelh; beisei a tlem tawh
AFC U19 Qualifier-a an match hmasa berah India chu Saudi Arabia lakah mualpho nghal mah se an match hnihnaah erawh an insiamṭha a, chak result erawh an hlawh chhuak zo chuang lo - Yemen nen goal khung loin an inhnehtawk.
Group D inkhel dangah Saudi Arabia chuan India an sawp hnuah Turkmenistan chu 3-0 in an sawp leh bawk a, inelna thlengtu Saudi tan AFC U19 khel turin an dinhmun a ṭha ta hle.
Mizo inlan
India squad-ah Mizo pahnih Edmund Lalrindika leh Lalawmpuia te an awm a, mahse Luis Matos enkawlna hnuaiah Mizo rawlthar pahnihin hmun pawimawh an chang phak lo. AIFF U19 neihsaah Opa leh Edmund hi player pawimawh pawl an ni ṭhin a, mah se Benfica B team boss hlui hnuaia inelna an hmachhawn hmasak berah erawh first eleven an la chang lo.
Luis Matos hian FIFA U17 World Cup-a a player hruai leh hriatchian sa rin zawk a thlang a, hei vang tak hian sawisel pawh a hlawh hle - a duhthlanna fuh tawk loh zia Saudi Arabia lakah hmuh turin a awm tawh. Match hnihah Lunglei rawlthar duhawm Edmund-a inlan ve ve mah se bench aṭanga tlan luhtir a ni a, SAFF U18 Championship-a match li an khelh aṭanga goal thum khung thei Opa tan hmun a la awm rih lo bawk.
Inelna kalphung
AFC U19 Qualifier-ah team 42 an inel a, Indonesia-a inelna hmachhawn turin team 15 an tling ang. Group A-J ah ṭhen hran an ni a, Group A leh B-ah team panga awmin group dang zawngah team pali zel an awm thung.
Group tina hmahruaitu hi nakkuma AFC U19 Indonesia-a khelh turah an tling chiang ang a, pahnihna zinga a ti
ṭha panga an tling bawk ang - inelna thlen vanga tling chiang tawh Indonesia-in an group-ah pakhatna dinhmun an luah emaw pahnihna ti ṭha panga zingah an tel phak a nih chuan pahnihna ti ṭha zinga parukna chu AFC U19 khel tur hian an tling ve leh ang.
India dinhmun
Group D-ah India-in match khat khelh tur an la nei a, zanin dar 6:35 hian Turkmenistan an hmachhawn ang - India hian hnehna an chang a nih pawhin zan dar 9:35-a Yemen leh Saudi Arabia inkhelah an innghah tel a ṭul tawh. Pahnihna lo ni ta tehreng pawh ni se pahnihna zinga a ti ṭha zual pangaah an tel phak loh chuan chance a la chhe cheu!
Saudi Arabia hian vawi hnih hnehna an chang tawh a, Yemen-in point li an neih mek tawh avangin chak lo pawh nise India tan chak bawk a, Yemen aia goal difference-a ṭhat bawk a ngai tihna a ni. A tawi zawnga sawi chuan India tan AFC Cup khel tura tling turin beiseina a tlem tawh a, an khelh ṭhat piahlamah midang result ngaihven a ṭul ang.
India tana inlan:
Dheeraj Singh (GK); Boris Singh, Jitendra Singh, Sahil Panwar, Sanjeev Stalin; Kumanthem Ninthoinganba (78’ - Nongdamba Naorem), Amarjit Singh (C) , Suresh Singh, Rahul K.P (45’ - Namgyal Bhutia), Abhishek Haldar (63’ - Edmund Lalrindika), Rahim Ali.