Champions League last 16 khel tur Spurs

Tottenham Hotspur-in Champions League last 16 khel tura match tawp bera an mamawh chu point khat a ni a, an point hmuh zat chu point thum a ni - a thiam 16 zingah Spurs an tel.

London club hian Thawhlehni zan khan khualmualah Marseille chu 2-1 in an hneh a, French club tan Chancel Mbemba chuan goal hmahruai khung mah se Spurs-in Clement Lenglet leh Pierre-Emile Hojbjerg hmangin an chhanglet a, 2-1 in an chak daih.

Group D inkhel dangah Frankfurt chuan 2-1 a Sporting Lisbon hnehin last 16 an lut ve bawk. Mualneitu Sporting tan Arthur Gomes chuan goal hmahruai khung mah se German club-in Kolo Muani leh Daichi Kamada (penalty) hmangin an chhanglet a, Europa League champion hi a tlang zawkah an ṭang.

Tottenham-in point 11 neiin, group hmahruaitu ni chungin knockout round an lut a, Frankfurt-in pahnihna ni chungin last 16 hi an lut thung.

Spurs an hlauthawng
Thawhlehni zana an inlan hmain, group D-a team paliten last 16 luh beiseina an la nei vek a, inkhelh laiin Spurs dinhmun hi vawi ruk ngawt a inthlak danglam hman - thlamuangin London club an khel lo.

First half hun pek belhah Spurs hlauhthawnna belhchhahin a awm a, Mbemba chuan Marseille tan goal hmahruai a khung. Hetihlai hian Sporting chuan Frankfurt lakah 1-0 in hma an hruai bawk.

Khatihlai khan inkhel tawp ta se, Spurs leh Frankfurt an tla ang - London club hi Europa League khel tur dinhmunah an ding a, Marseille leh Sporting chu tlang tur an ni thung.

Mahse, Spurs tan Clement Lenglet chuan minute 54-naah si phurh a sut a, Frankfurt-in Lisbon lakah Kamada penalty hmangin si phurh an sut bawk - inkhel tawp ta se, Spurs an tlang ang a, draw chiah mamawh Lisbon an tlang bawk ang.

Thawnthu danglam
Spurs coach Antonio Conte-a'n hrem vangin khelmual sir aṭangin a naute a ho thei lo a, London club-in draw chiah mamamawh mah se chesual thei reng an nih avangin fans thla a muang lo.

Inkhel lehlamah Frankfurt-in Kolo Muani hmangin minute 72-naah goal hmahruai an khung a, Spurs-in an la draw avangin tlang thei la ni mah se, inkhel tawp ta se, group hmahruaitu ni chungin Frankfurt an tlang dawn a, Spurs pahniha an ni ang.

London club-in group hmahruaitu ni turin chak an mamawh a, goal an khung belh a ngai. Mahse, Marseille zawkin chance hlauhawm an nei a, hun tawp nan minute 10 pawh tling lo chiah a awm tawh tihah Arsenal player hlui Alexis Sanchez leh Sead Kolasinac ten uiawm takin an hlah ve ve.

A tawpah erawh Spurs an vannei - hun pek belh minute nganaah Harry Kane chuan Hojbjerg tan a siamsak a, Danish midfielder hian chakna goal ni turin a khung. Spurs an tlang a, Marseille a reh.

Lawm a kim lo
Spurs-in hnehna chang mah se an lawm a kim lo - player chhuanvawr Son Heung-min chuan a luah hliam a tawrh avangin lakchhuah a ngai a, Pathianni zana Liverpool an mikhual zanah a inlan thei kher lo mai thei.

Conte team hian goal khung an zir ṭhat leh a ngai tel - Marseille-ah an goal nawr a na tawk lo a, Kane-a'n uiawm taka chance a hlah bakah Hojbjerg chuan crossbar a tih per bawk.

Tlarhnung lamah inenfiah a ṭul bawk - Marseille-in 64% zet ball chang chungin vawi 16 shot an nei thei a, vawi li ngawt target-ah a kal a, London club tana si ban nghaktu Hugo Lloris ni kher lo se chak lo thei an ni.

A tawi zawnga sawi chuan Spurs-in insiamṭhat an mamawh a, Napoli laka chak hlim Liverpool an mikhual zui dawn avangin an tan chawlh a rem lo.