Tlai dar 2:30-ah Bethlehem vs Venghnuai

Honda MPL9-ah team pariat chu chi hnihin an inthliar ṭan - pakhat chu semifinal kheh tum an ni a, pakhat dang leh chu inham tan tum an ni. Vawiin tlai dar 2:30 hian FC Bethlehem leh FC Venghnuai an inkhel dawn. Bethlehem hi relegate pumpelh tum an ni a, Venghnuai hi semifinal khelh tum an ni thung.

FC Bethlehem coach Victor Lalbiakmawia chuan, "Venghnuai hi kan point hmuh tawhna an ni a, tun ṭumah pawh hian hmuh leh kan tum ang. Electric Veng result hre chungin kan khel dawn a, chhuanlam siam a thiang lo," tiin Vanglaini a hrilh a, Venghnuai nen hian 3-3 in an inhnehtawk.

MPL kai thar tana chanchin lawmawm chu captain Sena Ralte a dam tawh a, Lammuala an khelh dawn bawk avangin Sena ball pet thiamna hi a ṭangkai lehzual ang. Chutihrualin FCB hian tlarhnung tihphui an mamawh hle. Match hnuhnung berah Chhinga Veng lakah 2-0 in an tlawm a, hemi hma hian Electric Veng nen 3-3 in an inhnehtawk - tun season-ah goal 18 an chhhuah tawh a, a tam mah mah deuh.

FC Venghnuai pawhin season ṭha tak an hmang a, I Day Football ang thoin MPL-ah pawh semifinal khelh an duh. Rindika Hmar hote hi Chhinga Veng leh Chawnpui te nen point 14 vek an hmu a, an chunga awm Mizoram Police pawhin point 15 an hmu - chetsual a thiang tawh lo.

Venghnuai hian match hnuhnung berah Aizawl FC an hneh lo a, I League club lakah dinhmun an siamṭhat theih loh avangin Bethlehem lakah point thum an sual chhuah a ngai dawn. FCV hian an goal khung khawl Lalrammuanpuia (Apuia) chu hliam vangin an chhawr thei dawn lo a, Lammual goal ropui tak tak khung tawhtu captain Vanlalthanga'n mawhphurhna a lak a pawimawh ang.

RG Stadium-ah Venghnuai ṭantu an tam ṭhin a, Bethlehem ṭantu pawh an tlem ngai lo. Lammual erawh ṭantu ngah zawk tur hriatthiam a har a, point thum hlawh chhuak turin ṭantu neih ṭhat a pawimawh ang.