Lammualah MPL9 khelh a ni dawn ; Chhun dar 11:30-ah Electric Veng vs Chanmari
Mizorama football inelna sang ber hi Lammualah khelh a ni ṭhin a, Honda MPL9 erawh match 36 khelh a ni tawh chungin RG Stadium-ah vek khelh a ni. Vawiin hian Lammualah khelh a ni dawn a, inkhel tur pawh a hmuhnawm dawn - team talbuai pahnih Electric Veng FC leh Chanmari FC te an inkhel ang.
Chanmari an chungnung
Tun season-ah Chanmari leh Electric Veng hi ṭum hnih an inhmachhawn tawh. I Day Football-ah khan group stage-ah Chanmari hian 2-1 in hnehna an chang. An inkhelhna hun hi vawiina an inkhelhna tur Lammual a ni a, Amos Lalnienga hmangin Electric Vengin khung hmasa mah se Chanmariin Lalhriatpuia leh Lalnunzira Sailo te hmangin an lehthal.
Team pahnih hi RG Stadium-ah September 9 khan an inkhel a, MPL9-a an intawn hmasak ṭum hian F. Lalnuntluanga penalty hmangin Chanmari 1-0 in an vannei. Tun season-a vawi hnih an inkhelh tawhah Chanmari an chak ve ve a, chungnung zawk ve ve mah se an dinhmun ṭhatna hi a tlem hle.
Coach thar
Chanmari FC-in inelna ṭan hmain champion an tum a, tunah erawh semifinal khelh pawh a harsa tawh dawn. MPL awm ṭantirh aṭanga knockout stage la khel ziah Chanmari hian knockout stage khelh leh ngei tumin coach atan K. Malsawmkima an lalut a, result ṭha an la nei thei chuang lo.
Mala hnuaiah Chanmari FC-in chak hmel an la hmu lo a, an match hnuhnung berah phei chuan Mizoram Police lakah 6-1 laiin an chak lo hial. Amaherawhchu Chanmari hi Police laka an khelh dan aṭanga teh chi an ni lo a, Electric Veng lakah hian squad ṭha zawk an nih avangin chak tura rinkai zawk an la ni tho ang.
Chutihrualin Electric Veng hian MPL khelh chhunzawm ngei duhin coach atan Lalremtluanga (RT-a) an lalut a, coach thar hnuaiah EFC-in chak hmel la hmu bik lo mah se chak loh an la nei lo. Player 10-a khel chungin Bethlehem an chelh thei a, Chawnpui chak tluang lai an titawp bawk. A tawi zawng chuan coach thar pahnihah Mala aiin RT-a a la che ṭha zawk.
Chak duh vs Chak duh
Chanmari leh Electric Veng inkhel hmuhnawmna tur chu team pahnih tan draw a thiang lo a, chak duhin an khel ve ve dawn. EFC player pawimawh Vanlalremkima'n (Tetea) hremna a hmang zo a, player an dam kim bawk avangin inrintawkna an ngah khawp ang.
Electric Veng manager Lalhmangaihsanga (Duata) chuan, "Chak ngei ngei kan tum tawp. Player kan dam kim a, tun hi table mawngphah chhuahsanna hun ṭha a ni," tiin Vanglaini a hrilh. EFC leh MPL kaithar FC Bethlehemin point ruk ve ve an hmu a, Chanmariin point sarih chauh an hmu. Electric Veng hi an chak a nih chuan paruknaah an awm thei ang.
Chanmari tan relegation battle a nih rualin semifinal kawng a la inhawng tel bawk. Coach Mala chuan, "Semifinal kan la beisei ve reng," tiin Vanglaini a hrilh a, point thum an hlawh chhuak a nih chuan semifinal khelh beiseina a sang dawn. Chanmari hi an squad a chhah bawk avangin en liam mai an la harsa. Team pahnihin pressure an ngah ve ve tawh a, khelmual chhung leh pawna an che ṭhat a pawimawh - player ang thoin mipui an chet ṭhat a ṭul ang.