Napoli chelh dingtu Liverpool

Beisei phak baka ṭhain Napoli-in season an hmang a, Thawhlehni zana Liverpool an hmachhawn hmain inelna hrang hrangah match 17 khelin tlawm an nei lo - Reds ngei pawh 4-1 in an lo sawp tawh.

Mahse, tun hnaia chak harsat tak Liverpool-in Anfield-ah an zia tak tak an lo chhuah a, tun season-a a vawi khat nan Napoli an tlawm - Mohamed Salah leh Darwin Nunez goal khung hmangin Reds-in 2-0 in an lo hneh.

Team pahnihin last 16 lut mah se, team pahnih intawna goal khung hnem zawk Italian club chu group A hmahruaitu ni chunga last 16 lut zawk an ni.

Group A inkhel dangah Ajax-in 3-1 in Rangers an hneh a, pathumna niin Europa League an khel dawn. Dutch club tan Steven Berghuis, Mohammed Kudus leh Francisco Conceicao ten goal khat ṭheuh an khung a, Rangers tana James Tavernier-a penalty chhuih luh chu mualpho zualpui khuhna chauh a tling.

Thutiama ding
Liverpool-in tun hnaiah team talbuai Nottingham Forest leh Leeds United chu Premier League-ah an ngam lo a, Jurgen Klopp-a'n hun thim aṭanga a team a kaih thawh tur thu sawiin a intiam.

German coach hian, "Awlsam taka chinfel theih a ni dawn lo a, mahse, kan tum ang. Mawi taka ni a chhuah lai chauha he hmuna awm tur ka ni lo a, hun harsa kan tawh lai pawha awm tur ka ni - ka theihna zawng zawng ka hlan ang," a ti.

Klopp-a thusawi tihhlawhtlin tumin, Reds-in Napoli hmangin bul an ṭan. Team pahnih hi an inhnehtawk dawn niin a lang hman a, mahse, Salah chuan minute 85-naah goal khungin, Nunez chuan hun pek belhah a belhchhah bawk.

Salah hian European football-a Liverpool tana goal khung hnem lamah Steven Gerrard a nih rual chiah a, match 64-ah goal 41 a khungna chiah a ni a, match 129-a goal 41 khungtu Gerrard-a record a nih rual a ni.

Inpuahchahna ṭha
Tun season-ah Liverpool tlarhnung an buai a, goal chhuah an uar hle. Mahse, Napoli lakah hliam vanga talbuai Ibrahima Konate a lo kir a, kum 23 mi centre back nena ding dun Virgil van Dijk pawh a inringtawk sawt em ni chu aw, tih tur khawpin a khel.

Napoli forward chhuanvawr Victor Osimhen meuh pawh Konate leh VVD te inkawpin an dah ṭha thei a, tlarhma lamin goal hnih an khung bawk avangin Reds tan chuan Tottenham Hotspur hmachhawn hma chiaha result atan chuan duhthusam a ni.

Reds manager Jurgen Klopp chuan, "Goal kha khung lo ta pawh ni ila, kan khelh danah khan ka lawm khawp ang. Kan chetsualna aṭangin kan insiamṭha tih kan lantir a, nghet taka kan thawk ho khan danglamna a thlen.

"A hunah tak kan nawr let a, hmachhawn kan awlsam lo hle," a ti a, a naute khelh danah a lawm thu a sawi - Pathianni zan dar 10:00-a an lenchilh tur Tottenham Hotspur tan ngaihthlak a nuam lo ang.

Klopp = 400
Kum 55 mi Klopp-a'n Liverpool a pan hnuah match 400 ngawt a team a kaihruai tling ta a, vawi 244 hnehna chanpuiin, vawi 90 draw an nei a, vawi 66 an tlawm - a win percentage hi 61% a tling phak.

German coach hian hetih chhung hian Premier League, FA Cup, League Cup, Champions League, UEFA Super Cup leh FIFA Club World Cup-ah te champion nomawi a chawipui a, Champions League phei chu vawi thum ngawt final a khelhpui.

Klopp hian Champions League-ah match 100 a team a kaihhruaina chiah a ni bawk. Match 100 aṭang hian vawi 58 hnehna a chang a, match 100 aṭanga chak hnem lamah Manchester City boss Pep Guardiola (61) chu a tluk loh awmchhun a ni.

German coach chuan, "Liverpool kan ni a, team ṭha bik kan ni. Nikuma kan thiltih kha tuman an la theihnghilh lo a, keini pawhin kan la hre reng. Mahse, a ṭangkai tawh lo - mi chuan he thu hi an lo ning mai thei. Mahse, theihtawp kan chhuah zel dawn a, kan game hi comeback pui turin a ṭha tawk," a ti a, season her rem theih a la inbeisei.