Barca president-in Messi chelh inbeisei

La Liga-a champion zo ta lo Barcelona president Josep Maria Bartomeu chuan an thiampuipa Lionel Messi chu Barca-ah a cham chhunzawm zel a beisei thu a sawi a, Argentina forward hian contract thar a ziah ngei a ring. 

Kum 33 mi Messi hi kum 2021-ah chuan Nou Camp-a a contract a zo tawh dawn a, tun hnaiah ual au taka a lungawi lohna a lantir bawk si avangin Messi hi a chhuah mai ringtu an tam hle. Mahse, Bartomeu chuan, "Messi hian Barcelona-ah ngei chawlh a duh thu vawi tam a sawi tawh a, contract thar a ziak ngei ang tihah hian rinhlelh tur a awm lo," a ti. 

Barcelona hian La Liga khelh zawh takah khan champion team Real Madrid chu point ngaa phak loin pahnihna an ni a, Champions League last 16 first leg-ah Napoli chu 1-1 in an inhnehtawkpui bawk - second leg chu August 8 khian an khel ang. La Liga-a goal 25 khung chunga top scorer dinhmun luahtu Messi hian nomawi chawi leh tur chuan an club-ah thil tam tak a inthlak danglam a ṭul thu a lo sawi tawh. 

Barcelona hi Paris St Germain forward Neymar nen sawizawm mek an ni a, mahse Bartomeu chuan an tan a harsat thu a sawi. Barca president chuan, "Player inthleng ang zawnga kan kal a nih loh chuan thil harsa tak tur a ni," a ti. 

Bartomeu chuan Inter Milan striker Lautaro Martinez an dawrna pawh an chawlhsan rih thu a sawi a, "Khelmual lamah kan rilru kan seng rih a, Champions League atan kan inbuatsaih a ni," tiin a sawi.