Man United tan chak a pawimawh

Manchester United chuan zanin dar 11:15 hian Real Sociedad an tlawh dawn. Europa League group E hmahruaitu ni tur chuan Spanish club hi an hneh ngei ngei a ngai, chak ringawt pawh a tawk lo - goal hnih tala an hneh a ngai dawn.

Europa League kalphung tih danglam a ni a, group hmahruaituin last 16 an lut tlang nghal. Pahnihna pawh an tlang tho, mahse pahnihna tan playoff (round of 32) khelh a ngai thung, kum tharah match hautak vawi hnih khelh belh a ngai dawn tihna a ni.

Man United hian an match hmasa berah Real Sociedad hi an ngam lo, a hnu lamah erawh insiamṭhain match li an chak zawn. Erik ten Hag-a naute an che chhe lo, chutihrualin anmahni aiin La Liga club an la che ṭha zawk a, an tan zaninah chak let ngei a ngaih phah.

Hliam vangin Raphael Varane an chhawr thei lo a, mahse tlarhnung laiah captain Harry Maguire a ding thei dawn. England defender hi kartawpa West Ham an hneh ṭum pawhin ṭha takin a khel thei - ani khel ṭha hi United bakah England tan a lawmawm ang.

Hammers laka inlan lo Victor Lindelof leh Antony te pawh an dam ṭha tawh. Man United manager Ten Hag chuan, "An dam hman ang, mahse an khel ngei ngei dawn em tih ka sawi lawk thei lo," tiin a sawi.

Man United hian kartawpah Aston Villa an hmachhawn leh nghal dawn a, match hautak a nih dawn avangin player insiksawi thiam erawh a ngai dawn. Anthony Elanga a inlan a rinawm a, forward Marcus Rashford leh Cristiano Ronaldo te an inlan bawk a nih chuan Sociedad tan dan an harsa ang.

Inkhel dangah Arsenal an inlan dawn bawk. Mikel Arteta naute hian chak an mamawh hunah PSV Eindhoven an hneh lo a, match hnuhnung berah ṭang taka an khelh a ngaih dawn phah, hmahruaitu ni turin chak a ngai.

Gunners hian Emirates Stadium-ah Zurich an mikhual dawn, an inkhelhna tur hi North London a nih avangin Arsenal hi chak tura rinkai an ni a, mahse chesual thei an ni ve tho a, point an mamawh avangin player ṭha ṭhenkhat chu an inlan a ngai ang.

Europa League
November 3, Ningani
Real Sociedad 11:15 PM Manchester United
Sheriff 11:15 PM Omonia Nicosia
Midtjylland 11:15 PM Sturm Graz
Feyenoord 11:15 PM Lazio
Olympiakos 11:15 PM Nantes
Qarabag 11:15 PM Freiburg
Trabzonspor 11:15 PM Ferencvaros
AS Monaco 11:15 PM Red Star Belgrade
Arsenal 01:30 AM Zurich
Bodo/Glimt 01:30 AM PSV
Dinamo Kiev 01:30 AM Fenerbahce
Rennes 01:30 AM AEK Larnaca
Real Betis 01:30 AM HJK
AS Roma 01:30 AM Ludogorets
Union Saint-Gilloise 01:30 AM Union Berlin
Sporting Braga 01:30 AM Malmo