Number 1 nih ka tum ber lo - Nadal

Rafael Nadal chuan Paris Masters a khel ve leh dawn a, inelna hmachhawn mah se world number 1 nih leh chu a thil tum ber a ni hran lo tih a sawi a, ṭha taka tournament khelh erawh a tum.

Tun dinhmunah Nadal hi world number 2 a ni a, amah ang bawka Spanish player Carlos Alcarez hnuaiah a awm. Paris Masters bakah ATP Finals khelh tur an la nei, an ranking hi a la inthlak danglam thei.

Chawlhkar 209 chhung number 1 lo ni tawh Nadal chuan, "Tournament hi ka khel ve a nih chuan theihtawp ka chhuah ṭhin. Champion tumin ka khel ṭhin a, a nihna tak sawi chuan ranking hisapin inelna ka hmachhawn ngai lo.

"A pawimawh ber chu nuam ti taka tennis khelh theih hi a ni a, hliam vanga chawlh reng mai chu rilru thlengin a nghawng ṭhin," tiin a sawi a, season tawp lamah tournament pahnih chu khelh a la tum a ni.

Grand Slam vawi 22 champion tawh hian, ṭum nga zet chu world number 1 ni chungin kum a lo khar tawh. Kuminah hian a vawi ruk nan hun ṭha a nei mek a, a ti thei a nih chuan nomawi chawi baka lawmna belhchhahtu a ni thei ang.