Haaland a lo kir hnai - Pep Guardioa

Manchester City manager Pep Guardiola chuan a striker ṭha Erling Haaland chu a dam hnai tawh tih a sawi a, tun kartawpa Fulham nen Premier League match an khelh hunah chuan a inlan theih tawh a rinawm.

October 25 khan Man City leh Borussia Dortmund ten Champions Legue an khel a, half time-ah Haaland hi thlak a ni, an thlak chhan hi a keah hliam a neih vang a ni a, a hnu lamah a la inkhel leh rih lo.

Leicester City nen league match an khelh ṭumin a inlan lo a, nizana Sevilla nen Champions League group match hnuhnung ber an khelhah a inlan lo bawk. Foxes lakah hian Citizens lamin goal khung an harsat phah niin a lang.

Guardiola chuan, "Haaland dinhmunah hian thil chiang lo chunga tih luih kan duh lem lo, thil ṭha lo zawk a thlen theih avangin a fuh lo. Tunah a la inkhel thei lo a, mahse kartawpah erawh Fulham a hmachhawn theih a rinawm," tiin a sawi.

Nipui bazar laia Man City zawmtu Haaland hian a awm hmun sawn mah se a buai chuang lo. English club tan hian inelna hrang hrangah match 15 aṭangin goal 22 a khung der tawh.