Marquez-a'n a tawnhriat a sawi

Tun kartawpah MotoGP tlan a ni dawn a, season tawpna a nih bakah rider champion tur chinfelna a ni nghal dawn. Tawnhriat nei ṭha Marc Marquez chuan tun hma lama thil thleng tawh sawiin, a ṭhiante chu fimkhur turin a chah.

Season kal laia hmahruaitu chu Francesco Bagnaia a ni a, amah hnaih bertu Fabio Quartararo aiin point 23-in a sang zawk, chesual loa a tlan tluan thei a nih chuan a champion ang.

Hun rei tak hmahruaitu ni thei, mahse tun hnaia a hmahruaina hlohtu Quartararo tan erawh chak ringawt a tawk dawn lo, a hmaa tlan Bagnaia-a'n point a hmuh belh loh a pawimawh dawn a, beisei erawh a la nei thei.

Marquez chuan, "Kum 2017 khan hetiang dinhmunah hian ka lo ding tawh. Season tawp nan Valencia MotoGP kan hmang bawk a nih kha, khatihlai khan point 21-in hma ka hruai fal.

"A nihna takah chuan boruak a sang duh a, chetsual mai pawh a hlauhawm hle. Ka sawi ve duh chu, hmahruaitu kan nih chuan chak ber nih tuma tlan vak hun a ni lo, point hmuh belh theih a pawimawh," a ti.

Kum 2017 MotoGP intlansiak hnuhnung berah hian, a hmasa ber aṭanga tlan chhuak Marquez hi pathumnaah a thleng, amah el phak bertu Andrea Dovizioso erawh chesualin point a hmuh belh lo thung.

MotoGP champion vawi ruk ni tawh Marquez hi kuminah chuan champion thei zingah a tel lo, hliam vangin inelna a hmachhawn tam tawk lo a ni. Season chawhnu lamah pangngai taka inelna a hmachhawn theih avangin, kum tharah chuan rider hlauhawm zinga mi a nih leh a rinawm.