Ruahsur hnuaiah India-in Bangladesh an hneh hram
T20 Cricket World Cup-ah India-in nimin khan Bangladesh chu run ngain an hneh a, ball tawp ber thlenga chak tur a chian loh avangin inkhel boruak a sang hle. Rohit Sharma hote hian point hnih hlu tak an hlawhchhuah avangin semifinal an hnaih sawt - match hnuhnung berah Zimbabwe an hneh chuan knockout stage an lut ang.
Adelaide Oval-a inkhelah Virat Kohli-a'n half century a siam a, India-in 184/6 runs an siam. Amaherawhchu Bangladesh opener-te an che ṭha a, ruah a sur bawk avangin India chak lo thei dinhmunah an ding. A tawpah erawh Men in Blue an vannei a, run ngain hnehna an chang.
Kohli bawk a che ṭha
Ṭhumvawrah India an vanduai a, Bangladesh-in bat hmasak an thlang. Adelaide Oval hi batter-te chet ṭhatna hmun a ni a, Men in Blue tan target sang tak siam a ngai.
India captain Rohit Sharma-a'n beisei a pha lo chhunzawm a, amaherawhchu a kawppui KL Rahul a rawn inlar ta. Kum 30 mi Rahul hian six vawi li a hlapchhuah bakah four vawi thum a hlap chhuak a, ball 32-ah 50 runs a siam. Bengaluru tlangval Rahul chet ṭhat hi India tan chanchin lawmawm a ni a, semifinal an thleng pha a nih chuan inrintawkna a nei chho thei ang.
Bangladesh lakah hian India tan Virat Kohli bawk a rawn che ṭha leh a, ball 44-ah thi loin 64 runs a siam. India captain hlui Kohli hi South Africa lakah chiah vawm hlum a la ni a, match pathum dangah Pakistan (82*), Netherlands (62*) leh Bangladesh (64*) lakah vawm hlum theitu a tawng lo.
Tun World Cup-ah Kohli hian match li khelh tawhah 220 runs siamin fifty vawi thum a vawi chhuak a, tun T20 World Cup chauh ni loin T20 World Cup hrim hrima run siam tam ber a ni. Kohli hian T20 World Cup-ah 1065 runs a siam tawh a, run 50 aia tam siam hi vawi 13 a nei tawh bawk.
Run 184 a chhe lo
Kohli bakah hian Suryakumar Yadav a rawn che ṭha a, T20 batter ranking-a pakhatna ni mek Suryakumar hian 30 runs siam turin ball 16 chiah a mamawh. Hardiky Pandya (5), Dinesh Karthik (7) leh Axar Patel (7) te an chet ṭhat loh avangin India-in target sang zawk an chhawp thei lo.
Amaherawhchu Ravin-chandran Ashwin-a'n over tawp berah six leh four vawi khat ve ve a vuak zarah India-in 184 runs an siam a, an khingpui Bangladesh a nih bawk avangin chakpui tham target an chhawpah a ngaih theih.
India an hlauthawng
Chak tura rinkai zawk India ṭantute ngaih ṭha takin an awm a, amaherawhchu Bangladesh opener Najmul Hossain Shanto leh Litton Das ten beisei phak baka ṭhain bul an ṭan.
Bangladesh batter Das-a'n powerplay a hmang ṭangkai a, India bowler a lamtir nasa hle. Das hian ball 27 lekah 60 runs a vaw chhuak a, Shanto-a'n a dinpui ve reng bawk avangin Bangladesh-in chak beiseina an nei hman.
Over sarihah India-in wicket an la lo a, Bangladesh-in 66 runs siamin ruah a sur zui. Tigers hi an bat ṭhat avangin ruahsur hi tawp lo se chak thei tur an ni a, India tan tih theih a awm tawh lo.
Rohit Sharma hote an vannei a, ruahsur tawp hnuah inkhelh chhunzawm niin DLS method hmangin inkhel pawh over 16-ah pawh tawi niin target 185 runs pawh 151 runs-ah pawh tawi a ni.
Over 8-naah Bangladesh tana che ṭha ber Das chu KL Rahul-a'n a run out tir a, Mohammed Shami-a'n Shanto a vawm hlum leh zui avangin India-in an dinhmun an siamrem a, chak turin an dinhmun a ṭha leh ta zawk.
Amaherawhchu T20-ah chuan over khatah engkim a danglam thei a, over 19-naah Taskin Ahmed-a'n four leh six rawn vuain Bangladesh tan chak turin over tawp berah 20 runs siam a la ngai.
India tan Arshdeep Singh a rawn pen chhuak a, Nurul Hasan-a'n six leh four a vuaksak a, Rohit-a hote chak lo thei an ni. Mahse ball tawp berah Bangladesh-in chak turin run sarih siam an la ngai a, six an vua an nih chuan an la in draw thei. Nurul Hasan-a'n run khat chauh a vaw chhuak a, Bangladesh-in 145/6 runs siamin India-in 5 runs (DLS method) hmangin hnehna an chang.