Chelsea aṭangin Pedro a chhuak dawn

Chelsea manager Frank Lampard chuan Spanish forward Pedro chuan season tawp rualin Stamford Bridge-a chhuahsan tur thu a sawi chiang a, Italian club AS Roma nen sawi zawm mek an ni. 

Lampard chuan Pathianni zana Wolves an hneh hnu lawkah, "Pedro tan chuan kha inkhel kha Premier League-a a game hnuhnung ber tur a ni a, he team tana a hnathawh hi a ropui takzet a ni," a ti. Chelsea hian Premier League-a an match tawp berah Wolves chu 2-0 a an hneh avangin season tharah Champions League an khel dawn tih a chiang a, FA Cup final an lut tawh bawk. 

FA Cup final hi August 1 zanah Chelsea leh Arsenal-in an khel dawn a, Blues hian Champions League round of 16 second leg an la khel dawn bawk - Bayern Munich mualah an leng dawn a, Stamford Bridge-ah 3-0 a an tlawm tawh avangin beisei a tlem thung. Lampard chuan, "Pedro hnenah hian a hnathawh avangin lawmthu ka sawi a, game khelhtur kan la neihah te min la châmpui dawn a ni," a ti. 

Pedro chuan, "Ka nunah in cham reng dawn a, FA Cup tan theihtawp chhuah ang aw," tiin fan-te thlah chungin hmabak an la neih thu a sawi ve bawk. Kum 32 mi forward hian kum 2015 khan Chelsea hi a zawm a, inelna hrang hrangah match 205 inlanin goal 43-a khungsak. Premier League (1), FA Cup (1) leh Europa League (1)-ah Blues hi a champion pui bawk a ni.