Pakistan tan chak a ngai

Vawiin tlai dar 1:30 hian Pakistan leh South Africa te Sydney Cricket Ground-ah an inkhel dawn. Shaheens hian T20 World Cup-ah semifinal khelh an duh a nih chuan group 2 team paruk zinga khel ṭha ber Proteas hi an hneh ngei ngei a ngai.

South Africa hi an vanduai a, match hmasa berah Zimbabwe hmachhawnin ruahsur vangin an khel zo thei lo. Hemi hnu hian Proteas-in Bangladesh an sawp a, India an hneh leh bawk.

Proteas hi batting line up a ṭhat ang bawkin bowling lamah an ṭha a, World Cup khelh mekah an che ṭhat tluan bawk avangin chak tur zawka ngaih a ni. Mahse, Pakistan hi dah hniam theih an ni bik lo - South Africa hneh thei turin an ṭha tawk.

Asia Cup ang thoin World Cup-ah pawh Pakistan chhuanvawr Babar Azam a che ṭha thei lo. Shaheens captain Azam hian India (0), Zimbabwe (4) leh Netherlands (4) te lakah run tam a la siam lo a, tun World Cup-a a run siam zat belhkhawm hi run riat chauh a la ni.

Pakistan hian South Africa hi an hneh dawn a nih chuan Azam a chet ṭhat a ṭul a, opener rintlak Mohammad Rizwan a pawimawh bawk ang. Shaheens hian bowler an nei ṭha a, chutihrualin Zimbabwe an hneh loh ṭumin Shaheen Afridi leh Naseem Shah ten wicket an la lo. Zimbabwe an hneh loh vang hian Pakistan dinhmun hi a chhiat phah hle.