European football khel lo tur Atletico
Atletico Madrid chuan Champions League-a an match hnuhnung berah FC Porto chu 2-1 in an ngam lo a, table mawngphaha awm chungin European club football inelna sang ber an mangṭha - Europa League pawh an khel dawn lo!
Porto tan Mehdi Taremi leh Stephen Eustaquio te chuan first half chhungin goal khat ve ve an khung a, 2-0 a ni. Atletico-in hun pek belhah goal an khung ve hram a, chu pawh Porto defender Ivan Marcano-a'n an lama a tihluh palh a ni.
Group B inkhel dangah Xabi Alonso enkawl Bayer Leverkusen leh Club Brugge te 0-0 in an inhnehtawk a, German club leh Atletico te point hmuh zat inang mah se, head-to-head a dinhmun ṭha zawk Leverkusen-in Europa League an khel dawn.
Diego Simeone-a'n kum 2011-a Atletico a enkawl hnua Champions League mawngphah luah chunga CL an mangṭhana hmasa ber a ni a, Argentine coach tan record duhawm lo a ni.
Simeone chuan, "Porto kha an ṭha zawk a, min hneh kha an phu a, kan phu ang ngeiin group mawngphah kan luah bawk. Kan inzir a ngai.
"Europe chu kan hnungah a awm ta a, kan hmabakah La Liga a la awm - Pathianniah kan inkhel dawn a, insiamṭhat nghal a ṭul," a ti a, chhuanlam a zawng lo.
Champions League group stage aṭanga an tlak hnuhnung pahnihah, Atletico hian 2009-10 leh 2017-18 khan Europa League an khel a, an champion zui - tunah erawh European football an mangṭha.
Atletico forward Antoine Griezmann chuan, "Round of 16 luh emaw Europa League emaw khelh pawh kan phu lo. Group match khatah chauh hnehna chan chuan hei hi kan phu tawk a ni," a ti.
Spanish club hian Champions League-a an match hmasa berah Porto (2-1) hneh mah se a hnu match ngaah chak an nei lo a, vawi thum tlawmin, vawi hnih draw an nei.
La Liga-ah pawh Atletico hi an ropui lo - league match 12-ah vawi thum an tlawm der tawh a, vawi hnih draw neiin, vawi sarih an chak a, table-ah pathumna ni mah se hmahruaitu Barcelona an phak lohna chu point kua a tling a, palina Real Betis nen an point hmuh zat a inang bawk.
Pathianni zan dar 6:30-ah Atletico hian Espanyol an mikhual dawn a, league-ah result ṭha zawk fan-ten an beisei ang - an match hnuhnung berah Cadiz chu 3-2 in an ngam lo!