Goa-in Jamshedpur an mikhual dawn

Zan thum zet inkhel loa an chawlh hnuah ISL pawh zaninah khelh a ni leh dawn ta a, FC Goa chuan zan dar 7:30-ah Jamshedpur FC an mikhual dawn.

FC Goa hian match thum an khelh tawh aṭangin vawi hnih hnehna an chang a, vawi khat an tlawm hi an match hnuhnung bera 1-0 a champion lai Hyderabad an ngam loh chu a ni.

Goan club hi season hnih zet an club tana ISL lo khel tawh Carlos Peña chuan a kaihruai a, Real Valladolid tana La Liga hial lo khel tawh Pena hnuaiah Goan club game a chhe lo.

FC Goa hian Mizoram player, midfielder Lalremruata Pialtu leh Ayush Dev Chhetri an kawl a, Lalremruata la inlan lo mah se Ayush erawh match thumah a inlan vek thung - zaninah pawh Jamshedpur hmachhawn tura beisei a ni.

Jamshedpur-in an match hmasa pahnihah hnehna an chang zo lo a, Odisha (3-2) laka an tlawm hnuin Mumbai City (1-1) chu an inhnehtawkpui. Mahse, an match hnuhnung berah insiamṭhain NorthEast United chu 1-0 in an hneh.

Men of Steel (Jamshedpur sawina) hian Mizo defender Ricky Lallawmawma, Laldinliana Renthlei leh Laldinpuia Pachuau te an kawl a, Ricky leh Dinliana hi match thum an khelh tawhah bul an la ṭan vek a, Dinpuia erawh match khat chauh a la inlan thung.