Chelsea chak zanah Milan an tlang

Premier League-a Brighton & Hove Albion laka mualpho hlim Chelsea chuan Champions League result hmangin an rilru na an thawi dam a, mikhual Dinamo Zagreb chu 2-1 in an hneh.

London club tan hian Raheem Sterling leh Denis Zakaria te chuan goal khat ve ve an khung a, Croatian club tana Bruno Petkovic goal khungin awmzia a nei phak lo.

Group E inkhel dangah tlang tura draw mamawh AC Milan chuan 4-0 in Red Bull Salzburg an hneh a, Olivier Giroud chuan goal hnih khungin, Rade Krunic leh Junior Messias ten goal khat ve ve an khung bawk.

Chelsea beiseina
Brighton laka 4-1 ngawta tlawm Chelsea fan-ten an team chak lai hmuh an duh a, last 16 lut chiang tawh mah se an mikhual lakah chak an duh. Mahse, Stamford Bridge-ah Blues an ngawi hmasa zawk!

Iranian defender Sadegh Moharrami chuan minute sarihna lekah ball a thlawh lut a, Chelsea defender-ten an tih tur an tih tawk loh avangin Petkovic chuan hnai set sawt aṭangin a tauh goal.

Team pahnih intawn hmasakah 1-0 in Dinamo an chak tawh a, Thomas Tuchel ban zui a ni - German coach thlaktu Graham Potter-a'n Croatian club a hneh bik dawn lo niin a lang hman.

A hun têah...
Chelsea-in goal an chhuah hma a, a chhanglet turin hun erawh an duh rei bik lo. Minute 18-na lekah Pierre-Emerick Aubameyang-a'n backheel hmangin Sterling tan a siamsak a, English forward hian si phurh sut nan a hmang.

London club-in an duhtawk mai lo - Juventus aṭanga loan hmanga an hawh Denis Zakaria chuan Blues tana a match hmasa berah goal a khung a, goal a khung hian minute 30-na a ni.

Kum 25 mi defensive midfielder hi transfer tawp niah khan Tuchel chuan Juventus aṭangin a lalut a, mahse, a chhawr hman lo. Potter-a pawhin a chhawr lo reng a, a chhawr chhunah Blues tana khelh a phu tih a pholang.

Chilwell a inhliam
Chelsea-in hnehna chang mah se chanchin lawmawm lo an hawn tel a, chu chu an left-back Ben Chilwell inhliam thu a ni. English defender hian a malpuiah hliam a nei a, World Cup a khel thei lo mai thei.

Blues boss Potter chuan, "Ka hmuh danah chuan a ṭha lo khawp mai. Zaninah kan khel ṭha a, mahse, Chilwell inhliam hi kan tan a pawi a, hmuh a nuam lo hle. Scan kan nei ang a, a dinhmun a ṭhat ka beisei," a ti a, he thu buatsaih a nih lai hian a dinhmun chiang taka sawi theih a la ni lo.

England chuan November 21, zan dar 6:30-ah Iran hmachhawnin an World Cup match hmasa ber an khel dawn a, group B-ah hian Iran bakah USA leh Wales te nen an awm ho a ni.

A hming Giroud
Milan-in point an mamawh zanah striker chhuanvawr Giroud a inlar a, goal hnih a khung - mikhual Salzburg laka an goal khung pali zinga goal thumah French striker hi a inrawlh vek!

Kum 36 mi striker hian minute 14-na lekah Italian midfielder Sandro Tonali-a corner pet aṭanga ball kal chu goal hmahruai ni turin a tauh lut a, minute 26-naa a goal khung erawh video assistant referee rawn a nih hnuah pawmsak a ni lo.

Mahse, Giroud a reh hlen lo - minute 46-naah ṭha taka a ball tauh thlak chu Rade Krunic chuan lo tauh ve lehin goal-ah a chantir a, minute 57-naah a awmna tur dik takah awmin an goal thumna a khung bawk.

Milan tan hun pek belhah Messias chuan ṭha taka ball lalutin an goal lina a khung ve leh a, San Siro-ah Italian club an chungnung - group E-ah pahnihna ni chunga Chelsea hnungzuiin, Champions League last 16 an lut.