Son-a'n World Cup khel lo mai thei

Tottenham Hotspur forward Son Heung-min chu a mit vei lam hliam vangin zai a ni dawn a, South Korea forward hian World Cup a khel lo mai thei.

London club hian Thawhlehni zan khan Champions League-ah Olympique Marseille chu 2-1 a hnehin last 16 an lut a, mahse, he inkhelah hian hliam vangin Son hi lakchhuah a ngai.

Kum 30 mi forward hliam hi a serious lo tura ngaih a ni zet a, mahse, zai hial a ngai dawn ta zawk. Spurs chuan, "Zai zawh a nih hnuah Son hi kan medical staff-ten an enkawl zui dawn a, a dinhmun chu kan tarlang zel ang," tiin thuchhuah an siam.

Tottenham hian Son-a chawlh chen tur hi an tarlang lem lo a, mahse, South Korea fan-te chuan Qatar-a World Cup a khelh loh mai hlauhthawnna nen an thlir.

South Korea hi group H-ah Portugal, Ghana leh Uruguay te nen an awm ho a, November 24-ah Uruguay nen inkhelin, World Cup-a an match hmasa ber an khel dawn.

Hetihlai hian Tottenham chuan Pathianni zan dar 6:00 hian Liverpool an mikhual dawn a, Son an chhawr theih loh tur hi Spurs tan channa a ni - Liverpool fans erawh an lawm khawp ang!

London club hian Reds an mikhual zawh hnuah, League Cup third round khel turin Nottingham Forest (November 9) chu khualmualah an lenchilh dawn a, November 12 zanah Leeds United an mikhual zui ang a, World Cup chawlhin a zui dawn a ni.