Chhinga Veng khingpui tur Police

4th November, 2022

Honda MPL9-ah semifinal khel tur a la chiang lo. Tun dinhmuna a lan danin Mizoram Police, Chhinga Veng, FC Venghnuai leh Chawnpui FC ten hmun ruak pathum an inchuh dawn niin a lang. Vawiin chhun dar 11:30 hian Lammmualah Police leh Chhingcows te an inkhel dawn a, a hmuhnawm loh ring suh.

Hello Sikkim
Sikkim Police-in kum 125 an tlin ropui taka lawm an tum a, invitation football tournament an buatsaih dawn. Mizoram Police pawh sawm bik zinga an tel avangin loh theih loin Sikkim-ah an zin a ṭul dawn a, inelna neih hun hi November 18-27, 2022 chhung a ni ang.

Police hi Sikkim-ah an zin dawn tih a chiang tawh a, Lalbiaksanga Colney hote hian Mizoram an chhuahsan hmain semifinal ticket an neih hman a ṭul. BS-a hote hian point 15 an hmu mek a, Chhingcows zawh hian Aizawl FC (Nov 7) leh Electric Veng (Nov 10) an hmachhawn dawn.

League round hnu-hnung pahniha FC Bethlehem leh Chawnpui FC an hmachhawn hunah chuan Police hi an kim a rinawm lo a, hemi a nih avang hian Police tan elpui Chhingcows hneh hi a pawimawh hle.

Inkhel pawimawh chu
Chhinga Veng erawh Police ang lo takin MPL-ah an insawrbing thei a, an dinhmun thlirin chak ngei an mamawh. Anand Gurung leh Lalremruata kaihhruai Chhingcows hian match hnuhnung berah FC Bethlehem 2-0 a an hneh avangin an phur thar a, chutihrualin Police hian an match hnuhnung berah Chanmari 6-1 in an sawp tih hriat a ṭha.

Team pahnih hi an intawn hmasak ṭumin goal awm loin an inhnehtawk a, vawiinah erawh goal a awm ngei a rinawm ta hle. Chhingcows tan Lalengzama Vangchhia-in a theihna a pholang ta a, Bethlehem lakah goal hnih a khung - Police lakah pawh Lunglei tlangval Zam Zama hi en bik a sual lo ang.

Mizoram Police coach Lalbiaksanga Colney chuan, "Kan chak ngei ngei a ngai. Kan ṭhat dan berin kan khel ang a, point thum hlawh chhuak turin kan khel ang," tiin chak a tum thu Vanglaini a hrilh.

Kumin I Day Football kha Lammualah khelh niin Police-in Chhinga Veng hi 2-0 in an hneh. Chhingcows coach Anand Gurung chuan, "Kan dinhmun thlir ila, draw pawh a thiang lo. Lammual hi Police-in an hmang thiam zawk a, RG Stadium-a khelh kha kan duh zawk chu a ni. Mahse, chhuanlam kan nei lo ang. Chak kan tum e," tiin chak an tum thu a sawi bawk.