RT-a hnuaiah Electric Vengin 'êng' an chhuah
Honda MPL9-ah Electric Vengin result ṭha beiseiin coach tawnhriat nei ṭha Lalremtluanga (RT-a) an lalut a, Venghnuai pa hian Electric Veng chu thim ata êngah a khai chhuak. Nimin chhun khan EFC hian an ṭhenawm club Chanmari FC chu 2-0 in an hneh a, table mawngphah an chhuahsan.
Electric Veng hian result ṭha beiseiin Mizoram team pawh lo enkawl tawhtu RT-a an lalut a, an khelh chinah coach thlak rah a lang chho zel. Coach RT-a hnuaia an match hmasa berah Chawnpui an chelh a, FC Bethlehem nena an inkhelh ṭumin 3-1 a an hnufual hnuah 3-3 in an inhnehtawk.
EFC coach RT-a chuan, "Game kan thlak a, risk lak a hun tawh. 'No risk, no gain' tih hi tun dinhmuna kan thupui a ni. Player-te kan hrechiang ta hret a, Pathian nen chuan thleng thei lo a awm lo," tiin a sawi a, Chanmari lakah risk an la tih a lang bawk.
Electric Veng an vannei tel a, Vanlalremkima (Tetea) hremna pawh tawisak niin inkhel pawimawhah inlan thei a, man of the match-ah thlan a ni hial. Chanmari lakah hian Electric Veng hi an chungnung bik lo a, chance neih dan pawh a intluk hle.
Amaherawhchu minute 66-naah Jonathan Lalrawngbawla'n a theihna sang tak a rawn pholang a, Bethlehem laka goal pawimawh khungtu Jonathan hian Chanmari FC lakah goal hmahruai a khung. EFC captain David Lalchhuanawma pawhin chance ṭha a hlah a, injury time-ah freekick aṭangin Tetea'n goal mawi zet a khung a, mual sira manager Lalhmangaihsanga (Duata) nena goal khung lawma an inkuah chuan an lawmna sanzia a sawifiah.
Chanmari FC erawh coach thar K. Malsawmkima hnuaia an match hmasa berah Mizoram Police nen an inhnehtawk a, hemi hnu hian Aizawl FC (0-1), Mizoram Police (1-6) leh Electric Veng (0-2) te an hneh lo. MPL apianga knockout khel ziah team tan semifinal thlir loin inhamtan dan zawn a ṭul tawh ang.
Mala chuan, "Kan team hi an naupang deuh a, kan che fuh thei lo. Han sawi vak ngaihna ka hre lo a, tih vak ngaihna pawh ka hre tawh lo. Kan inhnehtawk viau a, goal-ah kan vanduai ṭhin. Theihtawp chhuahin kan bei zel ang," tiin a sawi.