Table mawngphahah Bethlehem an tla thla

Honda MPL9-ah FC Bethlehemin semifinal khelh inbeisei FC Venghnuai lakah point khat hlu tak hlawh chhuak mah se an elpui Electric Vengin Chanmari FC an hneh avangin table mawngphahah an awm. Nimin Lammuala Bethlehem leh Venghnuai inkhelah hian goal a lut lo a, FCB midfilder JH Remlala chu man of the match-a thlan a ni.

Bethlehem coach Victor Lalbiakmawia chuan, "Electric Vengin hnehna an chang tih kan hria a, chuvangin pressure kan nei a, chak ngei pawh kan duh. Ṭum dang zawng aiin kan khel ṭhain ka hria," tiin inkhelh banah a sawi.

Coach Victor-a sawi ang hian Bethlehem an khel ṭha a, Inter Village-a Champhai Kanan champion puitu midfielder JH Remlala goal hmaah a hlauhawm thei a, Republic Veng tlangval Lalnunzira pawhin chance ṭha a nei bawk. Goal hmaah Bethlehem an hriam tawk lo a, chutihrualin tlarhnung an tiphui ṭha thung.

Venghnuai coach Lalrindika Hmar chuan, "Kan khel ṭha tawk lo a, kan goal bawh a na tawk lo. Lammual ai chuan RG Stadium-a khelh nuam ka ti zawk," tiin a sawi a, point hnih a hloh rualin point khat hlu tak an hlawh chhuak tiin a sawi thei bawk.

FC Venghnuai hian point 15 an hmu a, Mizoram Police ṭum hnih an hneh avangin head to head-ah an ṭha zawk a, pahnihnaah an awm. Chutihrualin an hnuai chiaha awm Chhinga Veng leh Chawnpui ten point 14 ve ve an hmu a, an dinhmun a him bik lo.

Bethlehem erawh point khat an hlawhchhuah avangin Chanmari nen an point hmuh inang mah se Chanmari lakah 3-2 in an tlawm tawh a; goal difference an nei ṭha zawk nachungin table mawngphahah an awm a ngai. Hriat tel atana ṭha chu Bethlehem leh Chanmari hi round tawp berah an la inkhel leh dawn.