Real leh Leipzig-in goal an surtir

Champions League last 16 lut chiang tawh mah se Real Madrid-in an mikhual Celtic lakah tha an thlah phah lo a, goal nga ngawt an khung - Scottish champion hi dawl zawrin an zawr a, 5-1 in Real an chak a, group hmahruaitu an ni.

Real Madrid tan Luka Modric (penalty), Rodrygo (penalty), Marco Asensio, Vinicius Junior leh Federico Valverde ten goal khat ṭheuh an khung a, Celtic tana Jota freekick chhuih luh chu mualpho zualpui khuhna chauh a ni.

Group F inkhel dangah tlang turin RB Leipzig-in draw an mamawh a, Shakhtar Donetsk tan chak a ṭul thung - a tawpah 4-0 in Leipzig an chak a, Christopher Nkunku, Andre Silva, Dominik Szoboszlai leh Valeriy Bondar (own goal) ten goal khat ṭheuh an khung.

Penalty vanneihna
Santiago Bernabeu-a inkhelah penalty vawi thum kan hmu - vawi hnih a goal a, vawi khat a goal lo. Real-in minute rukna lekah penalty a hmu nghal a, Valverde 'shot' satliah tak chu Celtic defender Moritz Jenz chuan a kutin a lo tawk fuh.

Referee-in penalty spot a kawk a, Luka Modric chuan harsatna nei loin goal-ah a chantir. Celtic-in Japan World Cup squad-a koh loh Kyogo Furuhashi leh Reo Hatate hmangin nawr let nghal mah se, goal an hlawh chhuak lo.

Minute 21-na a ni a, Celtic bawk an vanduai nawn - penalty area-ah Rodrygo-a shot chuan Matt O'Riley-a ban a per leh a, Brazilian forward hian a penalty hlawhchhuah chu goal-ah a chantir.

A hmuhnawm
Real-in goal hnih an khung hnu lawkah Vinicius chuan goal khung ngeina chance nei mah se a chhawr lo a, Celtic tan Furuhashi leh Hatate bawkin an chance neih an chhawr lo - Real si ban nghakin Thibaut Courtois a ding tlat!

Minute 35-naah Celtic tan hun ṭha a her chhuak - Ferland Mendy chu Israeli winger Liel Abada lakah a foul a, penalty a chawi. Mahse, Celtic leh Real danglamna chu Scottish club-in an chance neih an chhawr ve lo.

Celtic tan Croatian right back Josip Juranovic chuan penalty hi a pet a, mahse, Courtois bawkin a dansak - goal dang lut loin chawlhlawk hman a ni a, chak tur a chiang ti tih!

Goal a sur
Bernabeu-a inkhel an ni a, Real-in mikhual laka zahngaihna lantir an ngaihtuah lo - second half ṭan aṭanga minute rukna lekah Asensio chuan an goal thumna a khung a, Vinicius leh Valverde ten an belhchhah bawk.

Celtic goal-ah Joe Hart a hawihai a, English keeper tawnhriat nei ṭha tan hna a hautak hret. Celtic tan minute 84-naah Jota chuan freekick hmangin khung ve mah se, Scottish tan comeback turin goal an chhuah tam mah mah tawh!

Real-in hnehna an chan bakah, an lawmna belhchhah turin hliam vanga a chawlh reng hnuah Karim Benzema chu bench aṭanga luhtir a ni a, French striker a dam leh tak avangin Real ṭantute thla a muang leh sawt ang.

Leipzig an thiam
Point khat hmuh ngai chungin Leipzig an zin chhuak a, chak mamawh Shakhtar an sawp - Ukrainian club hian an intawn hmasakah, Germany-ah ngei Leipzig hi 4-1 in an lo sawp tawh a, German club-in a hunah tak phuba an la.

Leipzig tan Nkunku chuan minute 10-na lekah goal hmahruai a khung nghal a, Shakhtar an insiamrem hman lo. First half-ah goal dang a lut lo a, Ukrainian club-in beisei an la nei.

Mahse, Andre Silva chuan minute 50-naah hnai set sawt aṭangin goal a khung leh a, chak tur a chiang ṭan - minute 62-naah Dominik Szoboszlai chuan a belhchhah a, bench aṭanga luhtir Dani Olmo chuan a khung bawk.

Olmo goal khung hian Valeriy Bondar a per avangin Ukrainian defender own goal angin official-ah erawh chhinchhiah a ni thung.