PSG tan Mbappe-a record a tawk lo

Kylian Mbappe-a'n Champions League goal 40 khung tling thei naupang ber record thar a siam. Nilaini zan khan a team Paris St-Germain chu Juventus lakah 2-1 in hnehna a chanpui bawk, mahse group H hmahruaitu nih nan a tawk zo lo.

UCL goal 40 a khung tlin ni hian Mbappe hi kum 23 leh ni 317 mi chauh a la ni. Tun hma lama record lo siam tawhtu Lionel Messi (kum 24 leh ni 130) a khum ta chiah, a record siamna goal hi Messi siamsak a ni.

Group H inkhel dangah Benfica chuan Maccabi Haifa 6-1 in an sawp, hun tawp dawna Joao Mario goal khung chu PSG nena an inkar daidangtu a ni, a chung bera awm chungin group stage an khar.

PSG leh Benfica ten match ruk aṭangin point 14 ve ve an hmu a, team pahnih intawn tawhna bikah an record a inang a, an goal khung leh goal difference pawh a intluk, mahse tehna dang an hman a la ngai.

Group match an khelh chinah, khualmuala an goal khung chhut a ni a, Portuguese club hian goal kua an khung laiin PSG-in goal ruk an khung thung a, hemi tehna aṭang hian Benfica an chungnung ta zawk.

PSG coach Christophe Galtier chuan, "Ka naute khelh danah ka lawm, an thlen chinah pawh ka lawm. Keini ang bawkin Benfica pawh ka lawmpui, an thil tum an tih hlawhtlin avangin an lawmpui awm hle a ni.

"Vawi hnih ngawt Juventus kan hneh thei a, inelna kan hmang ṭha hle tihna a ni. Tunah chuan last 16-ah tunge kan tum dawn tih kan nghak tawh ang," a ti. Europe League lamah Old Lady an inlan dawn a, a hniam ber Maccabi tan erawh European football a tawp.

Group hmahruaitu an nih loh avangin, last 16-ah PSG hian group danga hmahruaitu an hmachhawn thei dawn. An hmaa ding thei te chu - Real Madrid, Manchester City, Chelsea, Bayern Munich, Napoli, FC Porto leh Tottenham te an ni.