Chawnpui FC dal theitu Aizawl FC

Zote Honda MPL9-ah Chawnpui FC-in semifinal khelh beiseina sang tak an nei a, Lalsangzuala Hmar leh hote dal thei chu Aizawl FC an ni. I League club leh Chawnpui FC te hi vawiin tlai dar 2:30 hian Lammualah an inkhel ang.

Chawnpui FC hi vawi thum an chak zawn hnuin match hnuhnung berah Electric Veng nen goal awm loin an inhnehtawk a, chutihrualin match li chhung chu hneh loh an tawng lo tih hriat a ṭha. Aizawl FC erawh tun inelnaa team ṭha ber an ni a, point 22 hmuin hmahruaitu an ni mek.

Aizawl FC hian Chawnpui zawh hian tun season-a ṭum hnih an hneh tawh loh Mizoram Police an hmachhawn dawn a, I League club hian Lalbiaksanga Colney hote hi hneh an châk tih chu tualchhung football hria chiang chin tan hai rual a ni lo. Mahse, AFC hian Police hmachhawn hmain Chawnpui an hmachhawn phawt a ngai.

Standly Rozario hote hian November thla aṭangin I League an khel dawn a, MPL-ah an insawrbing theih dawn loh avangin vawiina point thum hmuh hi a pawimawh lehzual. Chutihrualin Chawnpui hi tawnhriat nei ṭha coach Sanga Hmar enkawl a ni a, player tawnhriat nei ṭha Lalrinchhana Tochhawng bakah Aizawl FC captain hlui David Lalrinmuana leh striker hlui Lalliansanga (Notea) te an kawl avangin I League club laka point hlawhchhuah hi an inbeisei khawp ang.

Team pahnih hi an intawn hmasak ṭumin Chawnpui FC-in ṭum hnih hma an hruai a, a tawpah erawh Aizawl FC-in 4-2 in hnehna an chang. Vawiinah erawh a bul aṭangin an inkhel dawn a, an inkhelh tawhna result hian pawimawhna a nei lo.