Pakistan-in beiseina chhi nung

T20 World Cup-ah Pakistan-in semifinal khelh beiseina chhi nung turin nimin tlai khan South Africa chu 33 runs-in an hneh. Shaheens hian Proteas lakah point hnih hlu tak hlawh chhuak mah se India leh Zimbabwe an hneh loh avangin knockout stage lut turin inkhel dang result-ah an innghah a ṭul ang.

Sydney Cricket Ground-ah Pakistan-in bat hmasak an thlang. Mipui mit fukna captain Babar Azam a la che ṭha thei chuang lo a, run ruk chauh a siam. Babar Azam-a bul ṭanpui Mohammad Rizwan pawhin run li bak a siam lo.

Shaheens dinhmun chhe hman mah se Mohammad Haris leh Mohammad Nawas ten 28 runs ve ve an siam bakah Iftikhar Ahmed (51) leh Shadab Khan (52) ten half century an siam ve ve a, over 20-ah 185/9 runs an siam avangin chak turin an dinhmun a ṭha.

South Africa tan captain Temba Bavumba (36) khel ṭha mah se Quinton de Kock (0) leh Rilee Rossouw (7) te an che ṭha lo. Pakistan bowler Shadab Khan-a'n over riatnaah Bavuma leh Aiden Makram (20) te a vawm hlum a, Proteas dinhmun a chhiat phah bakah over kuana zawhah ruah a sur.

South Africa-in 69/4 runs an siam hman a, ruah hi sur tlang se Pakistan hi chak tur an ni. Ruahsur a bang a, over 14-ah inkhel tihtawi niin target chu 142 runs a ni. South Africa-in chak turin ball 30-ah 73 runs siam a ngai tihna a ni a, chak theih dan awm mah se Shaheens dinhmun a ṭha.

Heinrich Klassen-a'n four vawi thum rawn vuain South Africa tan beiseina a awm hman a, mahse Shaheens Afridi-a'n Proteas batter Klassen hi vawm hlumin 15 runs chiah a siam hman. Pakistan bowler Afridi (14/3) leh Shadab Khan (16/2) te an khel ṭha a, Proteas-in 108/9 runs chauh an siam thei a, 33 runs-in Pakistan an chak.

November 6, Pathianniah Pakistan-in Bangladesh an hmachhawn dawn a, Shaheens hi chak pawh ni se South Africa leh India ten an khingpui Netherlands leh Zimbabwe an hneh chuan Babar Azam-a hote hi an tla dawn tho ang. Chumi awmzia chu Proteas leh Men in Blue te hi inkhel dang result-ah an innghat ve lo.