Silly Point ; Lu dah ngil la, a dik vek mai ang
ICC T20 World Cup-ah cricket player langsar bik Virat Kohli a sapatal a, inelna ṭan tirh lama form ṭhain a kalsan ta thut emaw tih mai tur KL Rahul pawh Nilaini khan Bangladesh lakah half century a siam. Player ṭha pahnih hian thil dang zawng aiin cricket-ah hian lu lo pawimawh zia hi a rawn nemnghet kan ti thei awm e.
Mihring taksa bunga rit ber chu kan lu hi a ni a, he cricket inkhel ball te takte, kawh zet zeta rawn thlawk lo hmachhawn ṭhin batter-te tan lu dah ngil leh khawng ṭhat hi a pawimawh hle.
Technique, tactic leh style hi chu chi hrang hrang a awm thei a, amaherawhchu inkhel level leh standard a san zawh poh leh lu dahdan leh balance hi a pawimawh. Kohli leh KL Rahul te tun World Cup-a an khelh dan lo chik chuan, he thuziak pawh hi min 'Amen' pui ngei ka ring .
World Cup semifinal lut tur an hriat tan thuak thuak ta. T20 World Cup khelhna hmun hi Australia ball sawh sanna hmun a ni a, bat leh ball contest pawh a hmuhnawm hle. Team-te an intluk tlang tih hairual a ni lo. Cricket inelna sang World Cup hi lu dah ngil apiang chet ṭhatna, lu lama dik leh thluak fim team-te dinchhana a tih theih.
Mizoram thuneitu CAM
Kan kungpui Board of Control for Cricket in India ( BCCI) lam inthlan zawh hnuin, Mizoram cricket thuneitu sang ber Cricket Association of Mizoram (CAM) lam pawh term hmasa ber arkhawthimdai nawk nawk chunga kan hman zawh hnuin, naktuk lamah hruaitu thar kan inthlan ṭhat hun a lo hun veleh ta.
Office Bearers post panga leh council member post pakhat thlan chhuah tur a ni a, hming 11 an inpe. Hming inpe ho hi mimal taka ka mi hriat chian, ka cricket zinkawng bul min ṭanpui tute, tun hma lama min lo kaihruai ṭhin tute an ni. Mizoram team lama naupang tea ka khelh ṭan ve tirh lama ka senior, ka captain hlui te leh ṭhenkhat chu club leh professional kan ni hnua min kaihruai tute an ni bawk.
Tin, a kum naupang lam ka khelhpui leh ṭhianṭha te tia ka koh theih te vek an ni a. Mimal tak pawhin an zavaiin duhsakna ka hlan a ni. He thu buatsaih lai pawh hian, mimal takin ka titi pui deuh vek a. Thlan tlin an lo nih tak pawhin an hmachhawp, roadmap leh hmathlir te a ngaihnawm em em hlawm vek.
Hmathlir langsar chu khelmual dang sual chhuah te, grassroot leh youth lama ṭan lak lehzual te, administration leh management professional zawk te, thawhhona ṭha zawk te a ni a; tun ṭumah chuan kan thailang seng vek lo ang.
A engpawh chu lo nise, a tuate pawh hi kan hruaitu thar turte an nih hnuah, Mizoram Cricket hi hmun him leh hmathlir êng takin a awm tih heng gentlemen rual ho ka titipuina ṭang hian ka chiang thar ka ti lo thei lo. Mizoram Cricket tan hun kha leh chen tha leh zung lo seng vek tawh, hlawkna ni lo a, an tuina leh talent hmanga rawngbawlna chanvo chelh ve a inngai vek an ni.
Supreme Court dan angin, kumhlun a hruaitu tur tumah a awm theih tawh lo a, angel hawlhthlak, mi famkim pawn min lo kaihruai se, an dam chhung vawi khata term thum bak thlan theih an ni chuang lo tih an inhre chiang vek hian an puitlingzia leh hmathlir zau zia min hmuh chhuah thar tir lehin ka hria.
Mi famkim kalkhawm an ni dawn lo a, talent leh ṭangkaina tur inang lo, vei zawng leh agenda pawh nei hrang ṭhah, mahse hrui khat vuana, goal khat tinzawna thawk ho tur an ni tih an hai mawlh lo ang.
A pawimawh ber chu, an lu an dah ngil a, an rilru leh principle a hrisel phawt chuan, Mizoram Cricket hi ram ropui, Kanan ramah an hruai thleng ngei ang tih ka chiang.
Cricket-ah chuan lu hi a pawimawh ber si a.
- K. Vanlalruata