Champion lai Australia tan beisei tur a awm em?

T20 Cricket World Cup-ah semifinal luh tum boruak a sang hle. Group 1-ah inelna thlengtu leh champion lai Australia hmalam hun a chiang lo. Super 12-ah match khat chauh khelh tur a awm tawh chungin Aussies bakah hian New Zealand, England leh Sri Lanka ten semifinal luh beiseina an la nei vek.

Vawiin chawhma dar 9:30 hian New Zealand-in Ireland an hmachhawn ang. Black Caps hian match hnuhnung berah England hneh lo mah se net run rate (RR) a ṭha a, run khat lek pawhin chak se thil mak a thleng a nih ngawt loh chuan semifinal an lut dawn. Kane Williamson-a hote inkhel dang result-ah an innghat lo.

Tlai dar 1:30-ah champion Australia-in Adelaide Oval-ah beisei tur nei tawh lo Afghanistan an hmachhawn zui ang. Aussies erawh inkhel dang result-ah an innghat a, an tih theih chu chiang taka Afghanistan hneh a ni.

Tun dinhmunah Australia leh England hian point nga ve ve hmu a, Three Lions hian November 5, Inrinni hian Sri Lanka an hmachhawn dawn. New Zealand leh Aussies te hi an chak a nih chuan Asia champion Sri Lanka semifinal beiseina a tawp ang. England hian Aussies aiin NRR an nei ṭha zawk a, group match tawpna ber khel tur an nih bawk avangin Australia aiin a tawp a ṭha.

Group match hnuhnung ber a nih tawh a avangin chhiarkawp thiam a pawimawh tawh dawn a, cricket tui chilh chin chu calculator nen an inchhawp hial ang. Mawlmang taka hriatthiam dan awlsam ber chu Australia hian semifinal lut tur chuan chiang takin Afghanistan an sawp a ngai - chutichung pawh chuan England leh Sri Lanka result an ngaihchan tho a ṭul ang.